Mizo Idol ; Top 5 a chiang ta

Mizo Idol season 7 hmawr bawk a hnai zel a, tunah chuan top 5 tur a hriat ta.

Nizanah khan Top 10-te'n show ropui tak, mit leh beng titlai tak Idol thlirtute min hlui a, Top 5 result puan a ni bawk. Top 5-ah hian David Lalchawisanga Darlong, Deborah VL Hmangaihi, T Vanlalhmangaihi, Lalngaihzuali leh C Vanlalroluahtumi-te chu la tlingin J Lalchhanchhuahi, Eddie Malsawmtluanga, Jeffrey Lallawmsanga, PC Lalrinsanga leh Vanlalngaihsaka-te erawh chu Mizo Idol aṭangin kan mangṭha rih a ngai ta a ni.

Mizo Idol Top 10-te hi hla pahnih hmangin zan hnih an inel a, music track leh live music hmanga inelin an zai thiamin an zai ṭha hlawm hle a, mipui lam beng aṭang phei chuan tling tur emaw tla tur emaw pawh hriatthiam a har hial zawk.

Top 5-te leh an tlinpui hlate chu
David Lalchawisanga Darlong hian Top 10 round hmasa zawkah 'I belh pawn' chu thiam taka sa in, zan hnihnaah Robert Lalnghakliana hla 'I hlui thei lo' chu a sa thung a, heng hla pahnih hmang hian top 5-ah a inhlangkai ta a ni.

Deborah-i hian 'A pawi love' leh 'Bei a dawng lua e' chu zan khatnaah a rawn remix a, zan hnihnaah 'Chuailo parmawi' chu thiam takin a sa bawk.

T Vanlalhmangaihi chu 'Ka chuai leh ṭhin' leh 'Ka tan i hlu' hmangin top 5-ah a inhlangkai thung a, Lalngaihzuali chuan zan khatnaah 'An vui liam e' sain zan hnihnaah style mawi tak maiin 'I hmangaih ropui chuan' a sa bawk a ni.

C Vanlalroluahtumi (Tumtumi) chu 'Va chuan nang che' leh 'Chatuanin' hmangin top 5-ah a inhlangkai ve thung a ni.

Chutichuan, engtin zel?
Zirtawpni leh karleh Thawhlehni zanah Top 5-a la tlingte hi an inel leh dawn a, live music hmang vekin an inel tawh dawn. Intisiakna boruak a sang a, mipuiin show an hlut chho zel bawk a, tunah chuan contestant-te an fimkhur zual dawn.

Top 5 hnu lamah hi chuan final round a ni tawp tawh dawn a, show hmawr bawk a hnai tawh tak zet. Mizo Idol-a pakhatna hian Rs. 2,00,000 bakah Yamaha Aerox scooter a dawng dawn a, pahnihna chuan Rs. 1,00,000 a dawng anga, pathumna chuan Rs 70,000 a dawng thung ang.