Fortnite World Cup leh Dota 2 International ṭhulh
E-sport event lar tak Fortnite World Cup 2020 chu hripui leng vangin ṭhulh a ni tih kar liam ta khan Fortnite developer, Epic Games chuan an tarlang.
Game siamtu company chuan 'physical Fortnite event' an buatsaih ṭhin pawh kumin atan chuan online-in kumtluana buatsaih a ni rih dawn a, an third party event buatsaih ṭhin pawh online-in an buatsaih tawh mai thei tih an tarlang bawk.
Epic Games chuan Champion Series (FNCS) leh Cash Cups pawh online-a an buatsaih dawn thu an sawi a ni.
Fortnite World Cup hi nikum aṭang khan neih ṭan niin, main event-ah Kyle "Bugha" Giersdorf chu a champion a, $mtd 3 lai a dawng.
Dota 2 International ṭhulh
Dota series developer Valve Software pawhin kumin chhunga Dota 2 tournament buatsaih tur chu an ṭhulh thu an tarlang ve bawk.
Dota 2 tournament, The International hi khawvela e-sport event lar ber pawl a ni a, developer company chuan kawng hrang hrang dap mah se kumin chuan an buatsaih thei dawn ta lo nia tarlangin, nakkum lamah chauh an buatsaih tawh dawn thu an sawi.