MPL9 KickOff a hlawhtling

Mizoram Premier League Season 9 KickOff chu September 1, Ningani zan khan Dawrpui Multipurpose Centre-ah neih a ni a, sports minister Robert Romawia Royte-an a kickoff. Mizoram chhunga football inelna sang ber hi September 8, Ningani hian khelh ṭan a ni dawn.

KickOff hi MPL ground reporter Zamzami'n hnehsawh takin a kaihruai a, MPL club-ten model hmangin jersey tlangzarhna hun an hmang a, kal khawmte mit a tlai hle.

Aizawl FC-in Vamos kutchhuak kawr an ha a, main sponsor-ah NECS an hmang. I League club jersey sen hi Mizoram kil tinah hmuh tur a awm tawh a, hei hian football-in hma a sawn tih a pholang.

Chanmari FC-in Nike kutchhuak an ha dawn a, MPL chanchina chhinchhiahtlak a tling. CFC main sponsor hi Petronas an ni a, co sponsor-ah LP Electicals, Nike Aizawl, Wellness by Oriflame leh Halco Alluminium te an tel an ni.

Chawnpui FC-in RB Impressions ṭhui an ha dawn. Chawnpui main sponsor hi ZoPlast a ni a, co sponsor te hi L.T.Constructions, VLV Family (Melbuk), SP Online Shopping leh Mosia Tyre (MRF) te an ni.

Chhinga Veng FC-in MPL-ah Hurricane Sports, Mumbai kutchhuak an ha dawn a, KickOff zan bikah JMV kut chhuak an ha. Chhingcows main sponsor hi MW Venture an ni a, hun harsaah club hruaitu Dr Jerry L Pautu leh Lalhriatpuia te an tlan chhe ngai lo.

Electric Veng FC-in Czet, Sikulpuikawn kut chhuak an ha dawn. EFC main sponsor hi Marc O'Polo a ni a, co sponsor-ah Tuma Glass Centre a la awm bawk.

FC Bethlehem-in Vakiria kut chhuak an ha a, Vakiria hi main sponsor an ni nghal. FCB hi a co-sponsor pahnih Joseph Enterprise leh ALL IN TECH - Boring & Piling Section te an nei bawk.

FC Venghnuaiin Ambition, Kolkata kut ṭhui kawr an ha dawn. Venghnuai main sponsor hi D3 Business Enterprise (LG) te an ni a, co sponsor-ah Hightec Computer Institute leh Fone Inn te an nei a ni.

Mizoram Police-in kickoff-ah Huapzo Tailoring kut chhuak an ha a, MPL-ah Ambition Sportswear, Kolkata kut chhuak an ha thung ang. Police main sponsor hi Lloyd HM Business Centre an ni a, co sponsor-ah CCR Enterprise an nei bawk.

MPL KickOff zan hian Amawii Matilda leh Sangtei Khuptong ten zaiin mipui an awi a, beng an titlai hle.