Omomi Khiangte zaninah a PÁR dawn e.

Tiin, ni 13 vel liam taah khan Omomi Khiangte chuan a hla thar tur teaser tawi te, SaiWanah Sailo-in guitar perh saka a zaina chu a YouTube channel lamah a upload a, social media lamah a viral nghal. Mi tam takin a hla pum a tihchhuah hun in nghakhlel tih kan hria. In nghak chhuak dawn ta. Zanin hian Omomi Khiangte chuan a YouTube channel-ah a dah chhuak dawn e.

SaiWanah Sailo nena an thawhdunna hla 'Tui leh mei' hmanga Zofate thiam taka zaia min awitu Omomi Khiangte chuan zanin hian hla thar 'Pangpar' tih chu a tichhuak dawn a, a YouTube channel lamah thlira ngaihthlak theihin a dah chhuak dawn a ni.

He hla hi SaiWanah phuah tho a ni lehpek a, ani hi tunlai hian ṭhalai zingah a tla na a, a hla phuah pawh a hit ṭhin hle. Rebecca Lallawmsangi hla hit mek 'Ka neih chhun' pawh kha a phuah bawk a ni a, chuvang chuan 'Pangpar' pawh hi a hit leh hle a rinawm. A teaser aṭang khan a mawi lehpek dawn tih pawh a chiang. Tin, 'Pangpar' music video-ah hian amah pawh a inlan ve dawn bawk.

Omomi chuan a hla thar tihchhuah tur chu a phurin a nghakhlel tawh hle tih a sawi a, "A hit pawh ka beisei ve tho a, mahse subscriber ka la nei tlem lutuka, ka confi lo," tiin a hla thar tur chungchanga Vanglaini zawhna chhangin a sawi.

SaiWanah chuan Omomi hla thar tihchhuah tur chu hmangaihna lama mi vanduaite fuihna hla a nih thu leh hmeichhiain mipa a fuihna ang deuh hla a nih thu a sawi a ni.

Music video chu Anthony Wow kut chhuak a ni a, Music & Recording chu Tluanga Hnamte (Westend Studio) kut chhuak a ni thung.

Omomi leh SaiWanah thawhdunna hla hmasa zawk 'Tui leh mei' khan thla li chhungin YouTube-ah thlirtu maktaduai 4.2 chuang a nei hman a ni.

"Khuai i nih chuan keichu pangpar ka ni,
Damlo i nih chuan keichu damna rûn;
Hlim leh lungngaih nia i bula awm reng tur,
Zawhna i nih chuan keichu chhanna ka ni;
Zaimi i nih chuan keichu rimawi"