Mizor Idol Zanin aṭangin Top 50 ṭan dawn

Zaninah mi 25 an inlan dawn

Mizo Idol season 7 boruak a 'hot' chho zela, zaninah top 50 intihsiakna ṭan a ni dawn ta.

Zanin hian contestant 25 an inlan dawn a, Zonet Zawlbuk bakah Zonet Empai lamah a thlawnin a en theih leh dawn a, top 50 aṭang hi chuan Guitar, Cajon & Keyboard a hman theih tawh dawn a ni.

Top 50 aṭang hian intihsiakna neihna hmun sawn a ni dawn a, Music Home, Zonuam lamah intihsiakna hi neih tawh tur niin zanin leh naktuk zanah hian top 50-te hi an intihsiak dawn a, Inrinni zanah top 20 result puan a ni ang.

Idol boruak a ṭang chho a, kan zaithiam tihzawng leh ṭan zawng top 50-a inhlangkai zo lo an awm chho nawk ṭan. 1st round-a inhlangkai chin kha zai thiam tak tak vek an ni tawh a, ṭumdang ai mahin an zai thiam zawk emaw tih mai tur a ni hial! Chumi a nih avang chuan intihsiak boruak pawh a 'hot' chho zel dawn tih a chiang a, contestant-te pawhin top 20-a meuha inhlangkai tur chuan an theihna tak tak an phawrh a ngai tawh dawn tih chu thil chiang a ni.

Zanin aṭang hi chuan judge lamah mipui lawm Jaui a ṭhu tawh dawn lo thunga, Rinzauva, Robin-a leh Vari-te pathum chiah an ṭhu tawh dawn.

Mizo Idol 2022 1st round hi Inrinni liam ta, August 13 zanah khan zawhfel niin zaithiam 124 an inel a, Pathianni zanah khan result puan niin judge-te'n zai thiam an tihzual 50 an thlang chhuak leh a ni.

July 20 zan aṭang khan audition round an ṭan a, Champhai District aṭanga bulṭanin contestant zai thiam tak tak 400 chuang an inel a, tunah chuan 50 chiah an awm tawh. Kumin Mizo Idol hi September thla chhung chuan a hmawr bawk hman an tum a, pakhatna chuan Rs 2,00,000 leh Yamaha Aerox scooter a dawng dawn a, pahihnain Rs 1,00,000 a dawng anga, pathumna chuan Rs 70,000 a dawng ang.