Olivia Newton-John: A aw ngaihno bei tak nen fam rolung mualah a liam ta

Zaithiam leh lemchan thiam Olivia Newton-John chu Thawhṭanni khan kum 73 mi niin cancer vangin a thi.

Australian singer Olivia Newton-John hi kum 1992-ah daih tawh khan hnute cancer vangin enkawl a ni tawh a, dam leha ngaih a nih hnuah kum 2013 khan doctor-te'n a dar a cancer tih an hrechhuak leh a, hemi ṭum erawh hi chuan midang hrilh loin ngawi rengin a inenkawl thung a ni. Mahse May 2017 khan a hnute cancer chu a rawn let leh tih hre chhuak lehin, hemi ṭum hian a hnungzang lamah a ṭai darh tih hriat zui a ni leh bawk. Kum 30 lai cancer nena an inbeih hnuah Thawhṭanni khan chu natna chu a hneh zo ta lo a ni.

Rimawi khawvela mi ropui Olivia Newton-John
Rimawi khawvela chawimawina ngaihhlut ber Grammy award pali lai a dawng hman. US mite mai bakah khawvel pawhin a chart ngaihven ber, Billboard Hot 100 No.1 hla panga lai a nei a, Top 10-a lang phak phei chu 10 chuang a nei. Billboard 200 No.1 album pahnih nei bawkin Recording Industry Association of America (RIAA) chuan a hla 11 lai chu Gold a certify tawh bawk. Platinum-a vawi hnih lai puan hla pali lai a nei hman!

Khawvel pumah record maktaduai 100 chuang a hralh nia chhut niin kum zabi 20-na chanve hnu lama zaithiam album hralh ṭha ber zinga mi a ni hial! Rimawi huangchhunga chawimawina a dawn phei chu a tam lutuka tarlan sen a ni lo hial ang.

Lemchan khawvelah ve thung
Newton-John channa musical romantic comedy film 'Grease' film hming hre lo hi kan tamin a rinawm loh. Kha film kha a hunlai khan a aia sum lalut tam a awm lo hial! $maktaduai 6 senga siam film khan Box Office aṭangin $mtd 366.2 lai sum a lalut. Kum 1978-a hetiang zat sum lalut thei film chu, film ropui tak a ni tih a chiang.

Film pangai 15 laiah chang hmanin kum 2020 khan a film channa hnuhnung ber 'The Very Excellent Mr. Dundee' chu tihchhuah a ni. TV show eng emaw zatah a inlan bawk a ni.

Hollywood Walk of Fame-ah pawh kum 1981 khan Star-ah a hming a lo chuang vang tawh.

Chutichuan...
'Let Me Be There' leh 'If You Love Me (Let Me Know)'-te hmanga khawvel deng chhuaktu Olivia Newton John hian pasal pahnih a nei hman a, kum 1984 khan Matt Lattanzi nen inneiin kum 1995 khan an inṭhen leh a, John Easterling nen kum 2008 khan an innei leh a ni. A pasal bakah hian a fanu Chloe Lattanzi-te chu a thihsan.

Olivia Newton-John thih thu hi puanzar a nih rualin mi tam takin social media kaltlangin an ui thu an puangzar nghal a, khawvel media lian tak tak 'headline' a ni nghal a ni.

1) September 26, 1948 khan Cambridge, England-ah piangin kum 1954 khan an chhungkuain Australia-ah an pem.
2) Newton John hi Queen Elizabeth II chuan kum 1979 khan Order of the British Empire (OBE) a hlan tawh a ni.
3) United Nations Environment Programme-ah Goodwill Ambassador a ni ṭhin.
4) Kum 1999 khan Red Cross – Humanitarian Award for breast cancer and environmental charity work a dawng.

Duhtak Olivia, kan nun hi nasa takin i tihlim a ni. I hnathawh kha a ropui tak zet. Ka ngaina takzet che. Kan la inhmu leh anga, kan la intawng leh ngei ang. Ka hmuh tirh phat aṭang chea i tana kumkhuaa awm. Your Danny, your John!" - John Travolta