MCU hnungzuiin DC-in hma la dawn ; Kum 10 chhung atan ruahmanna siam

Warner Bros. Discovery CEO David Zaslav chuan DC Movie-te hmalam hun sawiin, an siam thar (reset) leh dawn thu leh kum 10 chhung atan ruahmanna an siam tih an sawi.

Leslie Grace 'Batgirl' an tihtawp chungchanga thu lengvak tam tak awm mek karah David Zaslav chuan webcast kaltlangin hemi chungchang hi a sawi a, " Batman, Superman, Wonder Woman, Aquaman i en a, heng brand-te khi khawvel khawi hmunah pawh hriat an ni. Kan siam thar leh a, a sumdawnna hi kan siam ṭha leh a ni. DC-a kum 10 chhung ruahmanna siam lam kan hawi dawn a ni," tiin Marvel Cinematic Universe ang deuhin, ruahmanna thui tak an siam thu a sawi a ni.

Film reng reng chu an peihfel thlap hma chuan an tlangzarh dawn lo tih sawiin, Warner chu film quality ṭha siamtua dinthar leh an tum thu a sawi. Film reng reng chu a ṭha thei ang bera siam kan tum a ni, a ti.

Zaslav chuan film hautak taka siam streaming lama chhuah chungchang pawh sawiin theatre ngeia chhuah chu a hlawk zawk thu a sawi. "Film man to tak streaming lama chhuah maw...economic value a neihna ka hre ve lo," tiin hemi chungchanga zawhna chu a chhang a, theatre lam chu an tinzawn ber a nih dawn thu a sawi.

Tunhnaiah Flash lema chang Ezra Miller chu che nawi chho viau mah se Flash movie chu an tihchhuah ngei dawn thu a sawi. "The Flash, Black Adam leh Shazam 2-te kan hmu tawh a, kan phur tawh hle. Lawmawm kan ti a, ṭha zawk pawhin kan la siam leh theih kan ring," a ti.

The Flash chu ruahmanna an lo siam tawh angin nakkum June 23-a tlangzarh an tum a, Black Adam chu kumin October 21-a tlangzarh tur niin Shazam: Fury of the Gods chu December 21-ah an tlangzarh thung ang.