A phun-rem avangin Justin Bieber chungah Mumbai mipui an lungawi lo

Mumbai khawpuiah, DY Patil stadium-ah a vawi khat nan Justin Bieber chu a concert a, ticket man pawh Rs. 75,000 te, Rs. nuai khat te a nih laiin, mipui 45,000 an pungkhawm. Concert a zo a, mipuite erawh an lawm vek lo. Bieber hian a phun rem niin an hria.

Concert entu tam tak chu Justin Bieber-a chungah an lawm lo hle a, a zainaah hian a zai tawh sa a play a, chu chu a phun rem a ni tiin an sawisel nasa hle a, India ram chanchinbu liante pawhin an tarlang. Justin Bieber hian phun rem hi a lo ti zeuh zeuh tawh. UK-a V Festival-a a zai ṭum pawh khan a phun rem tawh a, mipui an thinrim hle.

Justin Bieber concert meuh chu Bollywood star-te pawhin an ngaihlu hle. Entu zingah hian Sridevi, Boney Kapoor, Alia Bhatt, Jacqueline Fernandez, Aayush Sharma, Arjun Rampal leh a fanute pahnih, Arbaaz Khan leh Malaika Arora leh an fapa Arhaan, Anurag Basu, Poonam Dhillon, Raveena Tandon, Urvashi Rautela te chu a langsar zinga mi an ni.