SEKI Season 2-ah 'Chhim thli' a tleh SEKI 2022 Open Category winner Serkawn VC, Lunglei

SEKI Season 2 chu a hmawr bawk a ni ta. Serkawn VC, Lunglei chu pakhatna an ni a, Chanmari West LC Polysphere chu pahnihna niin Electric Veng LC chu pathumna an ni thung.

Metal music karah 'Chhim thli' a tleh na ber
Kar hmasa Thawhlehni zanah khan Top 5 inelna neih a ni. Top 5-a inlante chu Chanmari West LC Polysphere, Electric Veng LC, Chanmari West LC, Serkawn VC, Lunglei leh Ramthar LC-te an ni. Heng band panga zinga palite hian metal rawngkai vek an play a, Serkawn VC hi an genre a danglam hlak a, mahse chu chu an champion pui ta thung.

Serkawn VC guitarist Gabriel Lalhmangaihzual hian 'slide' a hnehsawh hle a, chu chuan an rimawi play chhuah pawh a chawi hle ti ila kan sawi sualin a rinawm loh. An music a solid ṭha a, comment an dawn dan aṭang pawhin endiktute lung an dum tlang tih a hriat theih.

Veng/Khaw hrang hrang 25 inelna, boruak sang tak leh rimawi thiam tak tak fuankhawm zingah Serkawn VC hi a ṭha berah thlan an ni ta a ni.

Individual lamah pawh Serkawn an che ṭha
Serkawn LC band member pahnihin individual lawmman an la. An drummer R Vanlalzawna chu Best Drummer a ni a, an guitarist Gabriel Lalhmangaihzuala chu Best guitarist a ni bawk.

Chanmari West Polysphere bassist Lalhmangaihzuala chu Best Bassist a ni a, Electric Veng LC keyboardist Lalrinsanga chu Best Keyboardist niin Ramthar Veng LC vocalist Lalremruata chu Best Vocalist a ni thung.

Band tel ṭhatna SEKI
Mizorama rock show lian ber tih theih, SEKI-a inlan band 25-te kha band ṭha tak vek an ni. Band hrang hrang inlanna YouTube-ah thlir let leh mah la, rimawi lamah Zofate'n hma kan sawn zia i hre thei ang.

Top 5-a inhlangkai chin ngat phei chu thiam tak an ni. A tute mai pawh kha pakhatna ni se, sawisel tur a awm lo hial awm e. An rimawi play chhuah a ṭang ṭha hlawm a, chhimtu mipui thunun thei ṭhiau band an ni. Rock music ngainatute chakna an phuhru hlawm tih chu a hmuna chhimtute aia hre chiang an awm lo ang.

Result puan zan kha...
Result puanna hun zan hniha hman a ni a, a zan hmasa zawkah U-19 result puan a ni a, Zirtawpni zanah khan Open Category result puan a ni ve leh. Result puan pahin concert puitham tak buatsaih a ni a, Mizoram chhunga artist ṭha ber ber an inlan, mipui pawhin nuam an ti tih pawh a chiang.

Vanapa Hall lam pawh top 10 intihsiak aṭang kha chuan a khat ṭhap ṭhap reng a, chhimtute pawh an kal satliah loa, a boruakah an cheng thiam hle.

SEKI Season 2 Result:-
Winner - Serkawn LC, Lunglei
1st Runner Up - Chanmari West Polysphere
2nd Runner Up - Electric Veng LC
Best Vocalist - Lalremruata, Ramthar Veng LC
Best Keyboardist - Lalrinsanga, Electric Veng LC
Best Drummer - R Vanlalzawna, Serkawn VC
Best Guitarist - Gabriel Lalhmangaihzuala, Serkawn VC
Best Bassist - Lalhmangaihzuala, Chanmari West Polysphere