Hip-hop music ṭha min hluitu Michael M Sailo Ui tak chungin thlah liam

Mizoramah hip-hop music a rawn lut ve ṭan a, mi tlem tein an la tuipui ṭhin a, chuta ṭanga hip-hop khawvela min dah chhuahpuitu, a sulsutu pawimawh berte zinga mi Michael Malsawmzela Sailo chuan Zirtawpni zan khan kum 37 mi niin khawvel a chhuahsan a, Inrinni khan ui tak chunga vuiliam a ni. A nupui, B. Malsawmtluangi, SP-i tia kan hriat lar leh a fate pahnih - Brooklyn Lalsangkima Sailo, kum 7 mi leh Marshall Lalhruaizela Sailo, kum 5 mite a kalsan.

Michael Malsawmzela Sailo hi Zirtawpni zan khan Dawrpui Jail Venga a nu cousin, Faktei a tlawh a, hetah hian bike-in a chesual a, a hliam tuar loin Zirtawpni zan dar 11:45 khan a nun a thlah ta a ni. Inrinni chawhnu dar 1 khan an in, Khatlaah Pastor L. Hmasawna’n vuiin a hun hnuhnung chu hmanpui a ni.

Michael M. Sailo hi Lalsanga Sailo leh Nunthari Sailo te fapa a ni a, an unau hi pathum an ni. Music lamah chuan Mizoramah hnuhma a ngahin a nei ṭha hle a, music hi a naupan têt aṭanga a tuipui a ni. Pune-a class I a zirlaiin school programme-ah music conductor-ah a ṭang tawh a, class VIII a nih laiin NE Adventist Ṭhalai Inkhawmpuiah David Hnamte zai chu guitar a perhsak tawh bawk.

Rap music a luhchilh chin pawh a rei tawh a, Pune-a Spi­cer College-a a luh laiin African ṭhalaite nen group siamin an rap tawh ṭhin; hetih hunlai hian Hyderabad,Mumbai, Bangalore, Chennai leh South Indian Capitals-ah te tour an nei a, Viva Concert, Hyderabad leh Goa-ah te opener an ni tawh bawk. Mizorama a rawn chuan chhuah hnuah pawh rap music ṭha leh changkang min rawn hlui zui.

Kum 2009 Sept. 17 khan Mizo hmeichhe zaithiam lar, B. Malsawm­tluangi nen an innei a, fapa pahnih an nei. An inneih hnu hian FM Zoawiah RJ-in hun eng emaw chen a thawk a, Mizorama RedFM an rawn luh nana sul sutu pawimawh tak pakhat a ni. A tlangval lai aṭangin international company hrang hrang nen agreement siamin, an zai, mobile phone ringtone chu internet hmangin hralh chhuah a ni a, he hna hi an chhungkaw eizawnna ber pakhat a ni.

A thih hma hian hla an record a, an hla record hi video shooting neih tuma an inbuatsaih mek lai a ni. He hla hi ‘Thinlai hnemtu’ tih a ni a, voice recording zawh vek tawh a ni a, he hla hi BPuia Zaiawi leh PL Engmawia, Sateek te phuah a ni.



Share this Post

Login to comment
No Comments