Army air ambulance hmangin Pervez Musharraf hruai haw dawn

Pakistan military dictator hlui General Pervez Musharraf chu damchhuah beiseina awma an hriat tawh loh avangin UAE-a damdawi-in aṭangin Pakistan Army air ambulance hmangin Pakistan ramah hruai haw tum a ni tih media report chuan an tarlang.

Kum 78 mi, Gen. Musharraf hian kum 1999-2008 inkar khan Pakistan-ah ro a rel a ni. Mahse a thuneihna aṭanga paihthlak a nih hnuah ram phatsana puh a nih avang leh ram danpui, Constitution a tihtawp avangin damchhung tang tura hrem a ni. Damchhung tang tura hremna an pek chu a hnuah tihtawp zui a ni.

Kum 2016, March thla khan damdawi lama inekawl turin Dubai a pan a, Pakistan-ah hian a kir leh ta lo a ni. Amyloidosis natna veiin, kum 2018 khan UAE-ah enkawl a ni a, a dinhmun hian ṭhat lam a pan hlei thei ta lo a ni. Kar thum liam ta aṭang khan damdawi-inah enkawl leh niin, hniam lam a pan zel a, a taksa pengten hna an thawk mumal tawh loh avangin a damchhuah leh beiseina a awm tawh lo niin a chhungte chuan a sawi.