BTS, Tun atan chuan mangṭha rih mai ule! Kan inhmu leh thuai dawn nia

ARMY tan chuan thu hriat nuam a va ni dawn lo em! Korean act zinga mi tam takin ropui ber hiala an ngaih, khawvel ṭhalaite'n an atchilh rawn Bangtan Boys chuan Thawhlehni khan solo lam kawng an hawi rih hlawm dawn avangin tiam chin awm loin band angin chawlh an la rih dawn tih an sawi.

BTS hian Thawhlehni khan YouTube lamah chawhlui an kil hona BTS Festa video dah chhuakin chutah chuan chawlh an lak rih dawn thu hi an sawi chhuak ta thut mai a ni. RM, Jin, SUGA, J-Hope, Jimin, V leh Jungkook-te chuan dawhkan khat kil hoin an hun kal tawha an thil tawn hrang hrangte hlim takin an sawi hoa, minute 20 vel an titiho hnuah Suga chuan,"Kan chawl lailawk rih dawn a ni," tiin a rawn sawi chhuak thut a, ARMY tan chuan thu hriat nuam a ni lo ngei ang.

Hun eng emaw chen hla thar an tihchhuah tawh loh hnuah Zirtawpni mai khan an anthology album 'Proof' an tichhuak a, chumi aṭang chuan kar khat em pawh a la liam lo tihah an chawlh dawn thu hi an puang leh ta a ni.

BTS Festa video entute chuan an nuna an band-in hmun pawimawh a chan zia an sawite pawh an hre ngei ang, an tan han inṭhen darh rih pawh thutlukna siam harsa a ni ang tih
a chiang.

RM chuan “Dynamite,” “Butter,” “Permission to Dance” leh “Life Goes On” an tlangzarh hnuah khan an band chu an danglam tawh tih sawiin, an danglam tawh tih chu an pawm a ṭul thu a sawi bawk. "‘Butter’ leh ‘Permission to Dance,’ hnuah khan eng ang group nge kan nih ka hre tawh lo a ni. Hla thu ka ziah leh hla ka phuah apiangin, a thu ken tur leh thehdarh tur chu ka ngaipawimawh hle ṭhin. Mahse chu chu tunah chuan a bo tawh a ni. Eng ang thawnthu nge ka sawi zel dawn ka hre tawh lo," tiin a sawi hial.

Engtin nge ni zel dawn?
Billboard lam chuan BTS thupuangtuin an hnenah hemi chungchang hi a sawifiah nia sawiin, chawlh lailawk an la pawh ni chiah loin solo project lamah an kal rih dawn tih a sawi niin an tarlang a, kawng dangin an la active reng dawn tho a ni tih a sawi thu an tarlang.

A hma pawhin...
Kum 2019 khan rei lote chhung an lo chawl zuai tawh a, nikum lamah pawh khan thawk an la zuai tawh tih kan hriat bawk kha. Mahse chawlh an lak hnua an rawn let leh apiangin a hma aia ṭha zawkin an rawn let leh emaw tih mai tur a ni.

Chawlh an puan hnu hian Twitter lamah chuan #ARMYFOREVER a 'trending' nghal a, ARMY-te social media lama an authawm a ngaihnawmin BTS an thlahna thu ngainawm tak tak chhiar tur a awm a, an fan tam tak chuan an lo let leh thuai pawh an beisei hle.

"Pumkhat nih zir thar leh turin hun eng emaw chen a hranga kan awm a ngai niin ka hria. Hei hi a ni lo zawnga min ngaihsak loha ruahmanna ṭha tak anga in pawm ka beisei" - J-Hope

"Engtikah emaw chuan kan lo kir leh ngei ang, tun aia puitling zawkin. Chumi hma chu, in malsawmna kan dil e" - Jungkook

BTS hi
- Kum 2010-a din kha niin kum 2013 khan Big Hit Entertainment hnuaiah rimawi khawvelah an rawn zuang lut ṭan.
- Bangtan Boys hi a awmzia tak chu 'Bulletproof Boy Scouts' tihna a ni.
- United Nations General Assembly session pathumah thu an sawi tawh
- South Korea President hnen aṭanga Order of Cultural Merit dawng thei naupang ber an ni.

Album an tihchhuah tawh dan
Studio albums - 9
Compilation albums - 7
EPs - 6
Soundtrack albums - 1
Reissues - 2
Single albums - 2