'Ka U Liana' Zaninah tlangzarh a ni dawn ta

Zaithiam Vanlalhmangaiha leh Thawhlehnaniropuia (Puipuia)-te channa Mizo film thar 'Ka U Liana' chu zanin dar 8:00 hian Vanapa Hall-ah tlangzarh a ni dawn ta.

'Ka U Liana' hi Zote Entertainment film siam niin, Runmawi-te chu co-Producer an ni. A story hi Aaron Malsawmdawngzuala ziah niin, rualban lo hmuhsitna tawk nasa tak unau chanchin tarlanna a ni - mittui nena en ngai chi a ni mai thei. Film siam lama hnuhma nei tha tak Mike-a kut chhuak a ni a, en manhla tur tak a ni ang.

A changtute
Durtlang North tlangval Vanlalhmangaiha chu a changtupa ber a ni a, film-ah hian sam a zuah avangin i hai mai thei! Zai mai bakah lemchan lamah pawh talent a lo neih ṭhat zia pholanin a awm thuai dawn e. A changtu nu ber hi Lunglei nula Esther Lalnunmawii a ni a, ani hi chu film industry lama sulhnu lo nei tawh a ni a, a thiamzia sawi nawn a ngai lo.

'Nutei Thingpui Dawr'-ah pawh hneh sawh taka lo inlan tawh Ruthi Chenkual kan hmu leh dawn a, Thawhlehnaniropuia pawh Ka U Liana ṭhianpa tur a ni ang. Anni bakah hian local TV vela kan hmuh ṭhin Lalteii Fanai a inlan bawk a, Robinson Sailo a la awm cheu bawk.

OST lam hi...
Tun thla tir lam khan a OST 'Ka chelh ngam lo che' tih chu tihchhuah a ni a, a hit zia sawi nawn a ngai lo. Zaii Hauchhum aw mawi zia leh zaithiam zia pholanin a awm a, ngaithlatute rilru a khawih hle. 'Ka chelh ngam lo che' tih hla hi Zaii Hauchhum phuah hi a ni nghe nghe a, music leh recording hi Rpa Ralte kutchhuak a ni bawk.

Ticket a awm dawn
'Ka U Liana' film tlangzarh hun hi mi tam zawkin an en theih nan ticket siam a ni a, a hmunah lei tur a awm ang. Programme hi dar 8:00-ah ṭan a ni dawn a, hemi hma hian Red Carpet a awm bawk ang. Padma Shree awardee B Sangkumi chu chief guest a ni dawn a, Zaii Hauchhum pawh a perform dawn a ni.