CSS Hindi Teacher-te an term tawp huna Rawih zui chu state kut a ni - Dr Thangtea

MNF vice president leh School Education minister hlui Dr R Lalthangliana chuan, CSS hnuaia Hindi zirtirtute chu an rawih hun a tawp hnua rawih zui zel chu state sorkar kutah a innghah thu a sawi.

Dr R Lalthangliana hian nimin khan Mizo Hnam Runah thuthar thehdarhtute a kâwm a; CSS Hindi teacher mi 1,305-te chu kum 2012-2017 atana rawih an nih thu sawiin, "CSS hnuaia rawih tur reng reng sorkar laipuiin an rawih hun chhung chu hlawh zawng zawng an tumsak tur leh a ral hun chuan state-in an budget aṭangin an rawih zui tur a nih thu ziakin state sorkar an hrilh lâwk," a ti.

Dr R Lalthangliana sawi danin, Education Minister a nih laiin CSS Hindi teacher 491 chu an hun a tàwp avangin an chawlh a ngai a, mahse, sokarin an thawh chhunzawm zel dan tur ngaihtuahin, mi 291 chu state sorkarin a chhawr chhunzawm a ni. Operation Blackboard hnuaia zirtirtute pawh an hun a tawp hnuah state sorkarkin a rawih chhunzawm bawk.

Hindi zirtirtu mi 1,305-te chu an khawngaihthlak tih sawiin R Lalthangliana chuan, "Sorkar dem ngawr ngawr kan tum lo, châwl lo thei se a duhawm hle. An hrawkhrui zai chah ngawt chu a hrehawm viau ang," a ti.

Dr R Lalthangliana chuan SSA chungchang sawiin, "Fimkhur a ngai hle. State matching share neih ringawt a tawk lo a, a huna peih thlap a ngai. Utilisation certifcate leh progress report pawh a hun taka tihfel a ngai," a ti a; a hun taka thil tihfel chuan sorkar laipuiin sum sanction-ah harsatna a siam ngai loh thu a sawi.

Dr R Lalthangliana chuan tun hnaiah Delhi-ah Ministry of Human Resources Development (MHRD)-a additional secretary Rina Ray leh economic advisor Dr NK Sahu te a kawm thu sawiin, "SSA sum chu a hun taka thil ṭulte tihfel a nih chuan sum lamah sorkar laipuiin harsatna a neih loh thu min hrilh a ni," a ti.

CSS Hindi teacher-te chungchang pawh MHRD hotute hnenah hian a thlen thu sawiin, "An kalphung nghet a nih avangin tihdanglam theih a nih loh thuin min chhang a ni," a ti a; hlawh bat mek erawh chu tun financial year chhunga an pek hman tur thu an hrilh niin a sawi bawk.