Elon Musk a hausa ber ; Billionaire list-ah India mi 10 an tel

American business magazine Forbes chuan kum tina a tih ṭhin angin World's Billionaires List 2022 a tichhuak leh a, Forbes-in list an siam ṭan aṭanga a vawi khatna atan Elon Musk chu pakhatna a ni.

Elon Musk hausak zawng chu...
Forbes-in list a siam hma pawhin Elon Musk hi chu khawvela mi hausa ber a ni tih chu mi tam takin kan hre tawh awm e. Tesla leh SpaceX neitupa, tunhnai lawka Twitter lama stake lian tham tak leitu Elon Musk hi Amazon dintu Jeff Bezos aiin a hausa tawh a ni.

Forbes-in an chhut dan chuan $tluklehdingawn 290.3 vel a nei a, ani aia hausa khawvelah an awm lo.

Nikum lama khawvela mi hausa bera Forbes-in a puan Jeff Bezos chu hausa ber dawttu a nih a ngai ta a, $tld 171 nei angin an chhut ve bawk.

Kumin Billionaire list-ah hian Mi 2,668 an lang a, Forbes hian list hi vawi 36 an tihchhuahna niin nikum list ai khan 87-in a tlem zawk a ni.

Heng mi hausa tawntaw an tarchhuah zawng zawng hausak zawng belhkhawm hi $trillion 12.7 a ni a, kum 2021 ai khan $tld 400-in a tlem zawk.

Thil chhinchhiah tlak ve tak chu, kumin list-ah hian Russia mi 34 laiin an kiam a, China lam pawh nikum lam aiin an tlem hlek bawk. Nikum lam aia hausa zawk mi 1,000 lai an awm ve thung a, mi thar 236 an awm bawk a ni.

Barbados, Bulgaria, Estonia leh Uruguay aṭangin a vawi khatna atan lang an awm a, chutih rual chuan America chu billionaire ngah ber niin 735 an nei. China chu ngah ber dawttu niin 607 an nei ve thung.

Forbes hian net worth chhutna atan hian March 11, 2022-a stock prices leh exchange rate an hmang niin an sawi.

India mi lang ve 10-te chu
Mukesh Ambani chu Asia mi zinga hausa ber nih chhunzawm lehin Forbes list-ah hian 10-na a ni bawk a, a hausak zawng chu $tld 90.7 a ni.

Gautam Adani and family chu 11-na niin $tld 90 a nei a, HCL Technologies Limited dintu Shiv Nadar chu 47-na niin $tld 28.7 a nei ve bawk. Serum Institute of India mi pawimawh Cyrus Poonawalla, Radhakishan Damani, Lakshmi Mittal, Savitri Jindal and family, Kumar Birla, Dilip Shanghvi leh Uday Kotak-te chu India mi zinga list-a lang phakte an ni.

Artist lamah chuan
Rihanna, JAY-Z leh Kanye West-te hming hmuh tur a awm.

Kum 34 mi 'Umbrella' hitmaker hi hmeichhe artist zingah chuan a hausa ber a, a vawi khatna atan Forbes list-ah hian langin $tld 1.7 vel nei angin an chhut. A sumdawnna Fenty Beauty cosmetics line leh Savage X Fenty lingerie-te chu a hausakpui a ni. List-ah 1,729-naah a awm.

JAY-Z pawh artist hausa ber zinga mi a ni. A hlathu lamah '99 problems' nei mah se sum lamah chuan a buai lo hle. Forbes billionaire list-ah hian 2,076-na niin $ltd 1.4 zet a nei.

Tunhnaia 'Ye' tia koh duh ta tlat, Kanye West pawh sum lamah a buai lo. List-ah 1,513-na niin $tld 2 vel zet zu han nei a! Adidas a thawhpuina leh Gap nen inremna ṭha tak an siam a vanneihpui chhunzawm zel niin a lang.