Midang chunga leng Ramhlun Venglai
Ramhlun Venglai chu Mahuma Memorial 1st Division Screening Tournament 2022 champion an ni. RVL hian Chhinga Veng chu wicket ruka hnehin tualchhung cricket team ṭha bik an nihna an pholang a, anmahni el phak an awm rih lo.
Suaka Cricket Ground, Sihhmuia final inkhelah Ramhlun Venglai hi ṭhum vawrah an vannei zawk a, vawm hmasak an thlang. Nimin khan ni a sa rumrut lo a, tun hnaia ruah sur vangin nipui ni mah se khelmual a ro dan a nep.
Chhinga Veng tan mimala cheṭha fal an awm lo, player park - Lalthlamuana (31 runs), William Rinawma Pachuau (20), Vanlalruata Khawlhring (17), Lalruatdika (14) leh Lalnuntluanga (12) ten run 10 chuang ṭheuh chu an siam.
Mahse, RVL ball vawm thiam B. Lalthlanmawia'n wicket thum a la a, over 39.1 chhungin run 156 chauh an tlin. Target sang pangngai tak ni mah se, batter nei ṭha Ramhlun Venglai an hmachhawn avangin ngaihṭha taka awmna chi chu a ni lo.
RVL hun a thleng, target umphak turin hun an mamawh rei lo. Over 29 lekah target an khum a, mi pali chiah an in hloh. Joseph Lalthankhuma (54 runs) leh Reuben Lalhruaizela (51 runs) te inkawp an che ṭha a, anni pahnih hian thi loin RVL an chakpui.
Season hmasa khan Ramhlun Venglai hian Chhinga Veng bawk hi hnehin President's Cup champion an lo ni tawh. Tun ṭumah hian league round-ah 3C hi an hneh a, final-ah an hneh nawn. League round-a sang ber ni chungin an champion zui a, tualchhung team ṭha bera chhal ngam an ni.
Champion team hian Rs 50,000 an dawng a, pahnihna in Rs 30,000 an dawng thung. Match an khelh apiangin a chak zawkin Rs 30,000 dawngin, a chak loin 15,000 an dawng thung, inhnehtawk chuan 22,500 ve vein an insem.
Final Thlirna Tawi
Ramhlun Venglai 160/4 (29.5) bt Chhinga Veng 156/10 (39.1)
Ramhlun Venglai hian wicket rukin hnehna an chang
Toss: Ramhlun Venglai lamin vawm hmasak an thlang
PoM: Joseph Lalthankhuma, Ramhlun Venglai
Mimal Chawimawina
Best Batsman Joseph Lalthankhuma, Ramhlun Venglai
Man of the Series Joseph Lalthankhuma, Ramhlun Venglai
Best Bowler Bobby Zothansanga, Chanmarians