Nicole-i'n Black Eyed Peas A zawm loh chhan a bialpa hlui!

American singer Nicole Scherzinger hi vawi eng emaw zat The Black Eyed Peas zawm tur anga sawi a lo ni tawh ṭhin a, tun thlengin a la thleng dik lo chu a nih hi. Hemi chungchangah hian Nicole-i bialpa hlui British sports star Lewis Hamilton chu mawhphurtu a nih thu an tarlang mauh mai.

Nicole Scherzinger hian kum 2001 khan American musical group lar Black Eyed Peas aṭang hian sawmna duhawm tak a dawng a, mahse Hamilton hian a remti lo niin an sawi. Nicole hian Hamilton-a thurawn angin Pussycat Dolls a zawm ta zawk niin, Black Eyed Peas frontman Will.i.am. chuan a sawi.

Hetih lai hian Nicole hi American rock band 311 member a ni a, Hamilton nen an inhriat chhoh tirh lai vel a ni. Black Eyed Peas sawmna a hnar hnu 2003 khan The Pussycat Dolls a zawm ta zawk a, 2010 thleng hun a hmang a ni.

Nicole hi Pussycat Dolls aṭang hian khawvel hriatah a inphochhuak pawh a tih theih a, Formula 1 driver ropui Hamilton-a thurawn hi a vanneihpui te pawh a tih theih awm e. Chutih rual chuan Black Eyed Peas ropui zia kan hria a, a thlen tur a thleng phak lo zawk em tih chu zawhna awm thei a ni. Black Eyed Peas frontman Will.i.am. chuan Nicole leh Hamilton te hi an intawn theihna tura hma latu ber pakhat a nih thu a sawi chhuak zauh bawk. Hamilton leh Nicole te hi kum 2007 aṭang khan an inzui ṭan a, 2013 khan an inṭhen a ni.

Black Eyed Peas hi an vocalist Fergie chuan nikum khan a chhuahsan a, amah thlaktu an la nei leh lo. Hetiang boruak karah hian Nicole Scherzinger hming bawk an lam ri leh a, a thleng dik tawh angem tih chu hunin a la hril dawn a ni.