Rapper G'nie = Boxer G'nie

Inhnekpui tur an be fel tawh?!

Mizo rapper lar ber zinga mi leh huhang ngah ber pawl G'nie chuan nimin chhunah khan social media lamah boxer a nih tawh thu a tarlang tlat mai!

G'nie chuan a thlalak pholangin a caption-ah 'This is no joke. I’m a pro boxer now. Who do you think should be my first opponent? #Rapper/Boxer' tih a ziak a, comment section lam en chuan mi tam tak chuan a tak tak a nih ring lo mah se Vanglani chuan G'nie chu a be nghal a, a uang lo! A hnek tur pawh an be fel vek tawh mai thei!

G'nie chuan Vanglaini palai zawhna chhangin nikum lam aṭang tawh khan Boxing lam luhchilh a tum tawh tih a sawi a, tunah chuan a tumna chu tisaah a chantir ta. A inhnek kan en thuai dawn tih a sawi bawk.

"K&P Entertainment nen inremna kan siam tawh a, April thla tawp lamah hi chuan kan inhnek hmel. Ka inhnekpui tur erawh ka la hre chiah bik loa, K&P lam erawh chuan an be fel tawhin ka hria," tiin G'nie chuan a sawi. April thla tawpah G'nie inhnek kan en hman dawn a nih chu.

G'nie hian Mizoram mai bakah hmarchhak hmun hrang hrangah ngaisangtu a ngah a, rapper huhang ngah ber pawl pawh a ni. K.O.N.E a tihchhuah phei kha chuan hmarchhak rap khawvel a nghawr nghing a, state hrang hrang rapper-te'n rawn chhang letin rap rimawi boruak pawh a lian chho hle a nih kha.