C. Sanga pualin music video thar

Mizo mipa zaithiam famta C.Vanlalsanga (C.Sanga) pualin a hla lo sak tawh ṭhin 'Tawnmang Lunglen' tih chu music video siam thar a ni a, zaninah Zonet-ah tichhuah a ni ang.

C. Sanga hi nikum November 10 khan a boral a, a thihcham a hnai ta hle. Hetiang boruak karah hian a nupui fanaute leh an laina hnaite chuan amah hriatreng nan music video hi an buaipui ta a ni.

C. Sanga hian kum 200 khan 'Tawngmar Lasi' album a tichhuak a, 'Tawnmang Lunglen' tih hla pawh hi he album ami hi a ni. A tirah music video siam a ni lo a, amah a awm tawh loh hnuah a pualin an siam thar ta zawk a ni.

He hla hi Lalhmachhuana (L) phuah niin, C. Sanga hian nalh takin a sa a ni. Music video-ah pawh hian C. Sanga zai hi hman a ni a, Venghlui nula Laltluangpuii chu model atan hman a ni thung. Video hi Dinagrafix siamsak niin, Zonet local channel leh MDM YouTube channel-ahte hmuh tur a awm thuai dawn a ni.

Mi ropui a fam
Zo rimawi khawvela mi ropui kan neih zinga mi C. Sanga hi November 10, 2017 khan Internal Vein Thrombosis natna avangin Aizawl Hospital-ah a boral a, Zoram mipuite lungngaiin kan kun a ni. A sulhnu ropui tak te chuan hriat a hlawh reng tawh dawn a, a hmun ruak erawh a zau hle thung.

C.Sanga hian music a ngaina em em a, guitar perh chu a nuam tih ber pakhat a ni. Kum nau­pangte ni chungin rimawi khawvelah a inhmang a, kum rei lo te chhungin Zoram mipui awitu a ni chho thei hial. A album hmasa ber 'Future ava Bright lo em' tih chu 2003 khan a sual chhuak a, Zoram dung leh vang a dengchhuak hneh hle. Kum 2007 khan 'Tawngmang Lasi' album a tichhuak leh a, hei pawh hi a hlawhtlinpui hle.

C. Sanga hi zaithiam a nih mai bakah hla phuah lamah pawh a duai lo hle. Hla hi 100 chuang zet a phuah hman a, Pathian hla, Lengzem leh Lenglawngte a ni hlawm. A hla phuah te hi aman a thluk a siam nghal mai ṭhin a, midang phuah a thluk siamsak pawh a nei nual a ni. A hla sak tam zawk hi chu ama phuah te an ni hlawm a, a hla midangin an sak pawh eng emaw zat a awm bawk.

Chawimawina nen
C. Sanga khan duhsaktu leh lainattu a ngah hle a, chawi­mawina hrang hrang nen mual a liam a nih kha. Mizo zaithiamten chawimawina an dawn theih chi chu C.Sanga hian a dawng kim deuh vek a, award 12 lai a dawng hman a ni.

Chung zingah chuan Moon Light, Vulmawi, Lelte leh Ṭhazual Award-te pawh a tel. Nikkuma Ṭhazual Award sem a nih pawh khan award pahnih lai a la dawng a ni. Lengzem huangah Best Male Artist atan thlan niin, he chawimawina hi ṭum thum lai a dawng hman nghe nghe. Hei bakah hian Daduh-i nen Best Duo/Group Award an dawng bawk.

C. Sanga hi kum lama naupang zawkte zai lama kaihruaitu ṭha tak a ni a, a zaithiam puite zah pawh a kai hle a ni. Music Domain Mizoram (MDM)-ah hruaitu pawi­mawh tak niin, president nihna hial lo chelh tawh a ni bawk.