Internet-a zawn him lo ber Kim Kardashian!

Internet khawvelah kan chen avangin kawng tam takah fimkhur a ngai a, duh duh haia zawn chiam chiam ngawt hi a him lo. Hetiang a nih mek lai hian UK-a cyber-security firm pakhat chuan milar zingah Kim Kardashian chu internet-a search him lo ber a nih thu an tarlang mauh mai.

Cyber-security firm hian UK-a internet hmangtuten milar an zawn nasat zual an zirchiang a, chutah chuan Kim Kardashian hi a him lo ber tih an hmuchhuak ta a ni.

Computer security company McAfee chuan site tam tak chuan milarte hming an hawh ṭhin tih sawiin, link ṭha lo tak tak click a awl bik a ni, an ti. Chu chuan site ṭha lo leh him lo tak takah luh a tiawlsam a, password leh personal information te an ruksak ṭhin tih an tarlang bawk.

McAfee chief scientist Raj Sa­mani chuan hei hian pop culture leh social media-ah pawh nghawng nasat tak a neih thu sawiin, fimkhur a ngai hle a ni, a ti.

Supermodel Naomi Campbell chuan Kim Kardashian hi a dawt a, 'Keeping Up with the Kardashians' star dang Kourtney Kardashian chu pathumna a ni. Zaithiam Adele leh Love Island host Caroline Flack te chu top 5-ah an lang bawk a ni.

Milar zingah - Rose Byrne, Love Island contestant Kem Cetinay, Britney Spears, actress Emma Roberts leh reality star Ferne McCann te chu an langsar viau bawk.

English singer Craig David chu nikum khan online-a zawn hlauhawm ber atan hian thlan a ni a, Kim Kardashian hming a rawn lang ve leh ta a ni.