Mark Zuckerberg hausakna tlahniam thut!

Mark Zuckerberg hausakna chu ni khat thil thuah $tld 31 velin a tlahniam!

Facebook neitu company Meta Platform stock market value chu $tluklehdingawm 230 chuangin Ningani khan a hlutna a tlahniam thut!

Meta hlutna tlakhniamna hi 26.4% lai a ni a, chumi avang chuan chief executive Mark Zuckerberg hausakna pawh ni khat thil thuah $tld 31 velin a tlahniam nghal niin Bloomberg Billionaires Index chuan a tarlang.

Mark Zuckerberg hausakna tlakhniamna ringawt pawh hi a tam tham rem rem hle a, Estonia ram kum khat gross domestic product nen a inhen niin BBC chuan a tarlang. Mahse heti chung hian Zuckerberg hian $tld 90 vel chu a la nei tho a, khawvela mi hausa ber zinga mi a la ni tho tho a ni.

Meta chuan Ningani khan ni khata Facebook hmangtu, daily active user (DAU) chu kum 18 chhunga a vawi khatna atan a tlahnniam tih an sawi bawk. Meta-in quarterly report an tihchhuah aṭanga a lan danin, khawvel pumah ni tina Facebook hmangtu chu maktaduai chanve velin an tlahniam tawh a ni. Facebook hmangtu tluklehdingawn 1.93 aṭanga chhut chuan a tlakhniamna hi tam lua angin lang lo mah se, company din tirha hmangtu an tlakhniam ṭum khatna a ni.