Mizo Idol 2018 ; Jerry Lalrinawma Suangtuahna ramah a cheng, a pa Zoliana (L) tan 'title' a hlan
Kar kalta Zirtawpni zan khan Mizo Idol Season 6 chu zawhfel a ni ta a, Chanmari tlangval Jerry Lalrinawma chu Mizo Idol 2018 atan thlan a ni.
Jerry-a chuan, "Awih harsa ka ti a, suangtuahna rama cheng ang mai ka ni. Ka pa Zoliana (L) tan Mizo Idol title hi ka hlan a ni," tiin Vanglaini palai a hrilh.
Mizo Idol Season 6-ah hian Champhai nula H. Lalnunsiami chu pahnihna a ni a, pathumna chu Chhinga Veng tlangval Ticos Darhmingliana a ni. Ticos-a hian 'Viewers Choice' lawmman a la tel bawk.
Ka pa tan - Jerry
Jerry Lalrinawm hi kum 2011 khan a pa Zoliana chuan a boral san a, hlawhtlinna a chan ruala a rilrua lang hmasa ber pawh a pa hi a ni.
Jerry-a chuan, "Ka pa khan Mizo Idol hi a ngaisang thei em em a, tun dinhmun hi ka thleng ang tih pawh a ngaituah phak lo ang. Hlawhtlinna ropui tak ka chan hi a tan ka hlan a ni," tiin, a pa a hriatreng thu a sawi.
Chanmari tlangval chuan, "Rin phak bakin mipuiin an hlut a, kei pawhin ka ngaihlu tak zet a ni. Mizo Idol ka nihna hi zahawm taka vawn ka tum a, theih tawp ka chhuah dawn a ni," tiin, Mizo Idol a nihna chu zahawm taka vawn a tum thu a sawi bawk.
Zinkawng ngaihnawm...
Jerry-a hian intihsiak a la hmachawn ngai meuh lo a, ṭum khat chu a lo tel ve zauh tawh. Chumi ṭum pawh chuan 'a fair tawk lo' tiin a bansan a, stage sang a thlen hnuah a tel zui duh lo.
Tun ṭum Mizo Idol-ah pawh hian tel tum sa a ni lo a, amah duhsaktu - Rochhingpuia leh Lalmuanthangi te chuan form an lo thehluhsak a ni. Audition hi Aizawl-ah a paltlang a, intihsiak a hmachhawn chhungin judge te fak a hlawh thei hle a ni. Mizo Idol-ah hian a tir aṭanga a tawp thlengin mipui lawm hlawh ber te zinga mi a ni a, a talent ṭha tak leh rim taka a thawh rah sengin tun dinhmun hi a thleng ta a ni.
Idol lamtluang....
'Jerry The Boss' an tih mai hian kum thum vel zet chu Delhi-ah zaiin ei a lo zawng tawh a, Mizoram a rawn chuan chhuah hnuah Mizorama show lian ber pawl Mizo Idol-ah hian a rawn inlar ta a ni. Jerry hi intihsiak ṭan phat aṭanga endiktuten an chhinchhiah kha a ni a, an tisual lo tih a lang ta. Mipui pawhin a zai an ngaina a, ṭantu a ngah hle.
Top 25 aṭang khan mipui nawlpui hriat a hlawh chho ṭan a, top 11-a 'Rinawmin' tih hla a sak hnuah phei kha chuan tunge a nih tih inzawh a ngai tawh lo. Social media lamah a lar a, a chanchin hi titi pui ber pakhat a tling hial.
Top 3 ten Mizo Idol nih tuma an intihsiakah khan - 'Ka chan hi' tih leh, 'Engtin' tih hla a sa a, Mizo Idol a nihpui ta a ni. Grand Finale zan hian result puan zawhah 'Rinawmin' tih hla hi a sa leh bawk a, mipui thawm a ring hle.
Hmachhawp chu...
Mizo Idol lo ni tawh te ang bawkin Jerry-a hian rimawi khawvelah theih tawp chhuaha inhman zui zel a tum thu a sawi. "Music video te pawh kan la siam chho zel turah ngai ila, chutih rual chuan hla ṭha tak a awm phawt a ngai a ni," a ti. Jerry-a hian album pawh a sawi ri thuak a, a zai ngainatute tan chuan chanchin lawmawm tak a ni ngei ang.
Hmun dangah zaia eizawngin chhuah a tum tawh lo bawk a, Zoram mipuiin a zai tam zawk ngaihthlak tur kan nei chho dawn a ni.
Ropui takin an hmuak
Jerry Lalrinawm hi Chanmari veng mipuite chuan Zirtawpni zan khan ropui takin an lo hmuak a, Chanmari kawnah mi ṭhahnem tak an pungkhawm. Lirthei tan pawh tlantlang harsa khawpin mipui pungkhawm an ṭhahnem a, an veng tihmingṭhatu hi a ropui thei ang berin an lo hmuak a ni.
Chhinga Veng mipui pawhin ropui takin Ticos Darhmingliana an lo hmuak a, zan khawtairek thlengin hlim takin hun an hmang a ni.
Champhai lam pawhin an khaw tihmingṭhatu H. Lalnunsiami chu Nilaini hian ropui taka lo hmuah an tum bawk.
Show ropui
Grand Finale zan hian show ropui tak a awm a, a tir ṭanga a tawp thlengin mit leh beng a tlai hle. TV-ah live-a pek chhuah a nih hma aṭangin show hi ṭan a ni a, commercial break lai pawhin a hmunah chuan zai ngaithlak tur a awm reng a ni.
Grand Finale-ah hian top 11 te an zai vek a, Kolasib nula Grace Lalchhanhimi a perform bawk. College of Veterinary Sciences and Animal Husbandry, Selesih-ah auditorium-a leng lo khawp mipui an pungkhawm a, light leh sound bakah stage thlengin a phusui em em vek a ni.
Lawmman
Mizo Idol Season 6 winner Jerry Lalrinawm hian Rs. 1,50,000 leh Scooter a dawng a, thil pek chi hrang hrang a dawng bawk. Pahnihna H. Lalnunsiami chuan Rs. 80,000 leh Lloyd TV 33 inches a dawng a, pathumna Ticos Darhminglina hnenah Rs. 50,000 bakah Lloyd Washing Machine hlan a ni bawk.
Ticos-a hian 'Viewers Choice' lawmman a la tel bawk a, hei hian pawisa fai Rs. 20,000 a keng tel a ni.
Mizo Idol
Zonet chuan kum 2007 aṭang khan Mizo Idol hi a buatsaih ṭan a, kumin hi Season 6-na chiah a ni. Mizo Idol lo ni tawh te hi mipa pali leh hmeichhia pahnih an ni. Mizo Idol hmasa ber chu Lallawmpuia, Champhai niin, Kolasib nula Grace Lalchhanhimi chu hmeichhe Mizo Idol hmasa ber a ni bawk.
Mizo Idol lo ni tawh te :
2007 - Lallawmpuia, Champhai
2009 - Lalchhanchhuaha, Sumsuih
2011 - Lalthuṭhaa, Siaha
2013 - Grace Lalchhanhimi, Kolasib
2015 - Rebecca Zorintluangi, Sairang Sihhmui