'Chris Tomlin & Friends' album July thla chhungin

Khawvela Gospel singer lar ber zinga mi leh Grammy winner ni bawk Chris Tomlin chuan tunthla chhungin studio album tlangzarh a tum tih sawiin, concert a neih hun tur a puang bawk.

'Our God' hitmakker hian June 26 khan hla thar pahnih 'Thank You Lord' leh 'Who You Are To Me' a tichhuak a, 'Thank You Lord'-ah hian  Thomas Rhett leh Florida Georgia Line-a Tyler Hubbard-te a thawhpui a, 'Who You Are To Me'-ah hian mainstream-ah pawh country group lar tak Lady A (Lady Antebellum ni ṭhin) kha a thawhpui thung. Heng hla pahnihte hi a album thar turah hian a dah tel ve ve dawn. Chris Tomlin album thar tur hi 'Chris Tomlin & Friends' tih a ni dawn a, July 31 hian digital-in a tlangzarh ang. A album 13-na tur a ni tawh dawn a, a album hming aṭang hian mi hrang hrang a zaipuina a dahkhawm dawn tih a chiang.

Hla 13-na tur albuma hla 12 hi  Corey Crowder chuan a pro­duce dawn a, David Garcia chuan pakhat produce dawn bawkin Florida Georgia Line chu executive producer an nih bakah Ed Cash chu hla pakhatah Co-producer a ni bawk. 'Chris Tomlin & Friends'-ah hian Brett Young, Russell Dickerson, Chris Lane, RaeLynn, Cassadee Pope, Blessing leh NEEDTOBREATHE-a mi Bear Rinehart-te a thawpui bawk a ni.

Chris leh Tayler Hubbard-te hian nikuma Atlanta leh Las Vegas-a Florida Georgia Line-te'n show an neih hnuah hla an phuah dun a, hemi aṭang hian Chris Tomlin & Friends project bul an ṭan ta a ni. 'Who You Are To Me' bik hi Lady A member-te nena an phuah a ni nghe nghe. "Ka music ka tichhuak thei tur hi ka phur tawh hle. He project hi rin phak bak a ni a, tun hmaa ka lo buaipui tawh ṭhin nen chuan a inang lo hle. Inkungkaihna, inṭhian ṭhatna leh thawhhona hi thilpek a ni. Ka tan chuan, a pawimawh lai ber leh a ṭha lai ber chu Pathian hnena a ropuina hlan hi a ni.

"Ṭhiante nena hetiang thil kan ti thei, hla kan phuah ho thei hi hlimawm ka ti a, mite rilruah pawh hna a thawh ngei kan beisei," tiin a album tihchhuah thar tur chungchang a sawi.

Chris Tomlin hian July 24-26 hian him zawk leh social distancing kalpui chung siin Tomlin Worship Tailgate Tour buatsaih a tum. Louisville, KY, Huntsville, AL leh Rock, GA-ahte show hi a nei dawn a ni.