Highest-Paid Actor & Actress ; Mipa zingah George Clooney a chungnung Emma nekchuaktu Scarlett Johansson

Forbes chuan film star zinga kum khat chhuga sum lalut tam zual an tichhuak leh ta a, mipa zingah American actor George Clooney aia sum lalut hnem an awm lo. Hetih lai hian hmeichhe lamah chuan Emma Stone chunga leng Scarlett Johansson chu sum thawk chhuak hnem ber a ni.

Kum 57 mi George Clooney chuan Forbes highest paid actor list-ah No.1 a la hauh thei a, kum khat chhunga a sum lakluh zat chu $mtd 239 a ni. Hei hi a lakluh zawng zawng zat a ni thung a, chhiah a pek hnuah chuan a danglam dawn tihna a ni.

George Clooney hi kum lamah upa ve deuh tawh mah se sum lakluh tam lamahah erawh khum thei an la awm chuang lo, Film an channa aṭanga an sum lakluh chauh a ni bik lo tih erawh hriat tel a ṭha. George leh a nupui Amal Clooney te hian fa phir, thla 14 mi - Ella leh Alexander te an nei a, an chhang chhiat lai pawhin chhungkaw pa ber eizawnnain a tawrh phah chuang lo tih a lang.

Khawvel huapa magazine lar Forbes chuan June 2017 - June 2018 chhunga milar sum lalut hnem list a tichhuahah khan American actor George Clooney hian film star zinga sum lalut hnem dinhmun a lo luah tawh bawk.

The Rock a langsar
He tih lai hian WWE super­star hlui Dwayne ‘The Rock’ Johnson chu sum lalut tam pahnihna a ni a, kum khat chhunga sum lakluh zat chu $mtd 124 a ni. The Rock hi $mtd 81 laluttu Robert Downey Jr. chuan a dawt a, Chris Hemsworth chu palina a ni.

Marvel superhero star Chris Hemsworth hian nikum June leh kumin June thla inkar khan $64.5 zet a lalut ve bawk.

Actor sum lalut tam zingah hian Jackie Chan, Will Smith, Akshay Kumar, Adam Sandler, Salman Khan leh Chris Evans te chu an lang bawk. Bollywood actor Akshay Kumar leh Salman Khan te top 10 an lang hian Bollywood-ah sum a tam tih a tarlang a ni.

Scarlett Johansson a ropui
Film star sum lalut tam zingah American an langsr a, hmeichhe zinga sum lalut tam ber pawh American actress Scarlett Johansson a ni. Avengers : Infinity War star hian $mtd 40.5 lalutin, nikum lama pakhatna Emma Stone chu a khum a ni. Scarlett hi kum 33 mi lai ni ve tawh mah se vanglai a la chen dawn chauh niin a lang a, Hollywood khawvelah kan la hmu zui zel dawn a ni.

Kum 43 mi Angelina Jolie hi mi tam takin a vang lai a pel tawh tih bawk ṭhin mah se, kumlama naupang zawk ten an la khum thei meuh lo.

American film star hian $mtd 28 a lalut a, Jennifer Aniston aia a sum lakluh tamna chu $mtd 10 vel lai a ni. Jennifer Lawrence leh Reese Witherspoon te chu top 5-ah an lang bawk.

Mila Kunis chu sum lalut tam parukna niin, Julia Roberts chuan a dawt. Cate Blanchett leh Melissa McCarthy te chu top 10-ah an lang bawk. Hetih lai hian Israeli actress Gal Gadot chu hnu khartuah a ṭang a, Wonder Woman star sum lakluh hi a turu teh chiam lo. Mipa lamah Bollywood star an lansarh viau laiin, hmeichhe zingah top 10-a lang phak an awm lo. Bollyood leh Hollywood thlenga sulhnu nei tawh - Priyanka Chopra leh Deepika Padukone te tan chona thar a ni ngei ang.