Dina Jathang album tlangzarh a ni dawn ta

Hla phuah thiam chhuak thar zinga hriat hlawh chho tak Dina Jathang chuan a music video album pahnihna tur, 'Zunleng Di I Zun' chu zanin hian a tlangzarh dawn ta.

Album tlangzarh in­khawm hi YMA sub-headquarters, Lunglei Conference Hall-ah neih a ni dawn a, dar 7:00 ah ṭan a ni ang. He album-ah hian hla 10 chuang a awm a, zaithiam hrang hrangin an sa a ni. Chung zingah chuan Ṭhazual chart lama lang zing tak tak - Jenny Jathang leh H.Lalvulmawia te pawh an tel.

Dina Jathang album hmasa kha a hlawhtling viau a, tun ṭuma mi pawh hi hit leh hle turah ngaih a ni. Music hi Marinmawia, Mac Lushai leh Jt Production khawih niin, recording hi Melody Recording Studio-ah tih a ni. Video hi Rpa Chhangte kutchuak a ni thung.

Artist naupang zawk chher hriam a, an talent phochhuah sak kawngah Dina Jathang hi a thawh­hlawk hle. A album tharah pawh hian mipui la hmelhriat loh hmuh tur an awm nawk dawn.

Dina Jathang hi tunlai hlaphuah thiam zingah chuan hmasawn chak leh beiseiawm ber pawl a ni chho mek a, mi hriat pawh a hlawh ṭan viau. Amah hi composer a nih bakah producer niin, artist thar ṭha tak tak a cherchhuak nual tawh a ni. Ṭhazual chart-a lang phak hla a nei nual tawh bawk a ni.

'Zunleng Di I Zun' music video album hi July thlaa tichhuah tum kha a ni a, August thla tir lamah tlangzarh a ni dawn ta zawk a ni.