Super Bowl 2021 half-time show-ah The Weeknd

Entertaiment khawvelin an ngaih hlut Super Bowl 2021 half-time show-ah pop star The Weeknd chu a perform dawn a, NFL lam pawhin hei hi an tichiang tawh.

Kumin Super Bowl-ah khan Shakira leh Jennifer Lopez-te an intheh ṭhil vel a, mipuiin an lawmin thlirtu maktaduai 104 chuang an awm a nih kha, nakkum lamah erawh Pathian zara kan dam a nih chuan The Weeknd che vel kan hmu ve dawn a nih hmel a, The Weeknd pawh hi a phur tawh hle.

The Weeknd chuan a duhthusam bak a nih thu sawiin khawvela act ropui ber Super Bowl ena a seilen thu leh entu nih bak chu a duhthusamah pawh a la sam ngai loh thu a sawi a, chutiang stage ropuia a ding thei chu chawimawina a nih thu a sawi.

A hming tak  Abel Tesfaye, The Weeknd hi kum 10 liam ta chhung kha chuan rimawi khawvela huhang nei lian ber zinga mi a ni a, single leh album platinum certify 45 chuang zet a nei.

A album thar ber 'After Hours' pawh kha a hit hle a, chart hrang hrang topper niin a  single Blinding Lights phei chu US Hot 100-a top 5 single ni rei thei ber a ni. Kum 30 mi The Weeknd hian Grammy Award pathum lai a dawng tawh nghe nghe a, nakkuma Super Bowl-a a perform tur pawh hi a pui hle ang tih ring ngam ila, kan ring sual lo ang.

Michael Jackson, Prince, Madonna, Lady Gaga leh Beyonce-te hnungzuiin Super Bowl half time show-ah stage-ah a duh ang takin hun a hmang dawn a ni a, a fan-te tan chuan a phurawm tawh hle ang.

Super Bowl 2021 hi Raymond James Stadium, Tampa Bay, Florida-ah nakkum February 7-ah an nei dawn a ni.