Mizo Idol 2018 ; Siaha Audition zawhfel a ni ; Kolasib Audition-ah result puang dawn

July 25 aṭanga ṭan Mizo Idol, Season 6 audition chu District hrang hrangah neih chhoh mek zel a ni a, a hmawr bawk a hnai ta. Ningani zan khan Siaha Audition zawhfel a ni a, vawiina Kolasib Audition neih turah result puan a ni ang.

Mizo Idol 2018-ah hian ṭum danga la tih ngaih loh District Audition a awm a, hlut pawh a hlawh hle. Champhai-ah bul ṭan niin, Aizawl-ah a hmawr bawkna neih a ni ang. District hrang hrang aṭangin a ti ṭha zual thlanchhuah an ni a,intihsiakna hautak zawk an hmachhawn zui dawn.

Kolasib lamah aw
Vawiin chawhnu dar 2:00 aṭang hian Kolasib District tan audition buatsaih a ni ve leh dawn a, mi 49 an inlan ang. Session hnihah ṭhen a ni dawn a, a ṭum hnihna chu zan dar 8:00 ah ṭan tur a ni ang. Session khatna-ah hian mi 25 an inlan dawn a, second session-ah mi 24 an zai ve thung dawn a ni.

Judge pathum an awm leh dawn a, Mizo Idol 2014, Grace Lalchhanhimi pawh a tel dawn. Kolasib nula bakah hian H. Lalhuapliana leh C. Vanlalhruaia te chuan endik hna hi an thawk dawn a ni.