World Choir Games-a silver medal la thei MIZO CARDINAL CHOIR

Khawvel huapa zaipawl intihsiakna sang ber World Choir Games vawi 10-na chu Inrinni khan zawhfel a ni a, India aiawha tel Mizo Cardinal Choir te chuan silver medal an la. World Choir Games hi July 4-14 chhung khan South Africa, Tshwane-ah neih niin, a pumpuiah Harmonious Chorale, Accra, Ghana te chu pakhatna an ni.

Zaipawl khawmpui lian ber hi a vawi khat nan South Africa chuan a thleng a, khawmualpui hrang hrang aṭanga a

ṭha thlan chhuah te an fuankhawm a ni. India aiawha tel Mizo Cardinal Choir te hi 'Mixed Chamber Choir category-a 'The Champions Competition Final Round'-ah an inlan a, zaipawl ṭha ber ber 295 zet intihsiak zingah a che ṭha ber pawl niin, silver medal an la a ni.

Zinkawng
Mizo Cardinal Choir te hian July 8 khan Mizoram chhuahsanin South Africa hi an pan a, final lut sa an nih avangin a tir lamah an inlan lo. July 13 khan intihsiaknaah hian an inlan a, sap hla pathum leh Mizo hla pakhat an sa. Khawmualpui hrang hrang aṭanga zaipawl ṭha fuankhawm zingah a che ṭha zingah telin, The Champions Competition Final Round-ah hian point 6,425 an hmu a ni.

Intihsiakna hi category hrang hrangah ṭhen niin, Gold leh Silver medal la hi zaipawl eng emaw zat an awm a ni.

India No.1
Musica Mundi-in zaipawl ṭha ranking a tihchhuahah Mizo Cardinal Choir te hi India No.1 ni lai an ni a, khawvel pumah 263 an hauh phak bawk.

India ramah zaipawl ṭha tak tak eng emaw zat an awm a, chung zingah chuan Mizo Cardinal Choir te hian a ber nihna an hauh thei a ni. India No.1 an nihna hi South Africa-ah pawh hian zu pholangin, India leh Mizoram an tihmingṭha hle.

Musica Mundi ranking-a top 500 te hi World Choir Games-ah hian tling chiang sa an ni a, Mizo Cardinal Choir pawh hi final lut sa zingah an hian an tel a ni.

Sulhnu nei ṭha
Mizo Cardinal Choir hian sulhnu ṭha tak tak an lo hnutchhiah tawh a, bungthar an kai zel bawk. Nikum October thlaa Sri Lanka khawpui Colombo-a Asia-Pacific Choir Games-ah khan an lo tel tawh a, Vocal Ensemble Category-ah pakhatna an ni.

Khawmualpui champion an nih avangin hian World Choir Games-ah pawh hian India ai an awh tur hian an tling a ni.

Mizo Cardinal Choir-ah hian member 18 an awm mek a, an conductor chu Lalsangliana Rate a ni.

World Choir Games hi INTERKULTUR buatsaih niin, kum 2020 khian Belgium-ah neih leh a ni ang.

World Choir Games
• Kum 2000 khan a vawikhat nan 'Choir Olympics' tih hming puin Austria Linz, Austria-ah neih a ni.
• Kum 2006 khan China chuan a thleng a, heta ṭang hian World Choir Games tia thlak a ni.
• Kumin hi a zaipawl khawpui lian ber neih ṭum 10-na leh South Africa-ah nghah a nih ṭum khatna a ni.
• China leh Austria te chu ṭum hnih thleng thei awm chhun an ni.
• Kum hnih dana neih ṭhin World Choir Games hi 2020 khian Belgium-ah neih a ni ang.
• Interkultur Foundation buatsaih niin, moto chu 'Singing together brings nation together' tih a ni.