Zorema Khiangte 'Saltang ṭawngṭaina' khum thei an awm lo

Ṭhazual Fakna chart-ah Zorema Khiangte hla 'Saltang ṭawngṭaina' chu pakhatna a ni a, Mawitea 'Chibai ka buk che' chu pahnihna niin One in Christ 'Zing Daifim' chu pathumna a ni bawk.

Inkharkhip hma lawk khan Mizo Kristian film thar 'Grace' chu tlangzarh a ni a, hmun hrang hranga chhuah a nih hma­in inkharkhip a ngai ta si a. 'Grace' chuan thawm a nei lian hman lo. Mahse he film OST 'Saltang ṭawngṭaina' erawh a hit a, YouTube-ah pawh thlirtu nuai thum dawn an awm tawh.

He hla ṭha tak hi sap hla lar tak 'Water into Wine' Mizo ṭawnga lehlin a ni a, Lalfakawmi Fanai leh Zorema Khiangte-te lehlin niin an letling fuh hle a, music video ringawt pawh a hmuhnawm bawka, Ṭhazual Chart-a No.1 a ni thei hi a awm hle.

Zorema Khiangte hi 'Grace' filma-a a changtupa ber hi a ni bawk a, a sa mawiin ngaithlak pawh a manhla hle.

Mawitea'n nikum October thla tir lama a tihchhuah 'Chibai ka buk che' chu pahnihna a ni a, chart hmasaah khan pangana a ni a, pahnihnaah a rawn invawrh a ni.

Chart hmasaa pakhatna One in Christ hla 'Zing Daifim' chu pathumna a ni ve thung a, kumin kumtir lama an tihchhuah kha niin an music video-ah hian Ruatdiki pawh a la inlan hman a ni.

Chart hmasaa 10-na Lalthleng­liani Jongte 'A hming fak la' chu palinaah a rawn invawrh a, hetihlai hian Fiona Lalmalsawmi hla Chart-a pakhatna pawh lo ni tawh 'Kristaa Lawmna' chu pangana niin Top 5 khartuah a ṭang a ni

Tunṭum Chart-ah hian hming langsar tak tak rawn inlar ṭan an awm a, Betsy, Hmingtea Chhangte leh Pensy-te pawh top 10-ah hian an lang a ni.

1    Zorema Khiangte     - Saltang ṭawngṭaina

2    Mawitea    - Chibai ka buk che

3    One In Christ    - Zing Daifim

4    Lalthlengliani Jongte    - A hming fak la

5    Fiona Lalmalsawmi    - Kristaa lawmna

6    Bethsy Lalrinsangi    - Isua nen chuan

7    Hmingtea Chhangte    - Hun duhawm

8    Seraphic Choir    - Hnehna Lallukhum

9    Mapuii    - Zirtirtu ṭha

10    Pensy    - Ka tan Kraws-ah ngei chuan