Hailey Baldwin - hringnun zinkawng

American model Hailey Baldwin hi mahni tawka lar ve tak a ni a, Canadian singer Justin Bieber nen an inhual hnu phei chuan khawvelin a chanchin a ngaihven zual hle a ni. Justin Bieber chuan kum 21 mi Hailey Baldwin nen an inhual thu a nemnghet tawh a, an inneih hun tur an inrinsiak vel mek.

Hailey Baldwin hi November 22, 1996 khan a piang a, a pa chu American actor Stephen Baldwin a ni. Amah hi feet 5 leh inches 7.5 niin, modeling chu a eizawna tura a thlan a ni.

Bul ṭanna
Kum 2014 khan professional huang­ah lutin, New York agency Ford Models chuan contract an ziahpui. Khawvelin a hmelhriat chho ṭan a, magazine lar tak takin cover girl atana an sawm chho ṭan bawk. Kum 2015 khan American Vogue chuan January issue-ah cover girl atan an hmang zui a, heta ṭang hi chuan a chanchin hi inzawh tam a ngai tawh lo. Magazine lar tak tak Wonderland, Miss Vogue, Teen Vogue leh Jalouse te chuan chuan an magazine kawm mawitu atan an hmang zui zat a, sawmtu a haichham lo hle.

Kum 2016 khan New York modeling agency IMG Models chuan contract an ziahpui leh supermodel- Miranda Kerr leh Alessandra Ambrosio te nen ramp an zawh ho ta zak zak a ni. Show lar tak takah a inlan zui a, New York Fashion Week leh London Fashion Week thlengin a inlan zui a ni.

Kum naupangte ni chungin model lar leh hriat hlawh tak a ni chauh a, hmabak nei eng ber zinga mi a ni. Modeling bakah hian film show hrang hrangah a inlan ṭhin a, acting leh show host lam pawh a tithei viau bawk.

Kristian ṭha mi
Hailey Baldwin hi Kristian ṭha tak a ni a, sakhaw ngaina mi a ni. Bald­win chuan, “Kristian chhungkua aṭanga seilian ka ni a, kohhran mi ni tura enkawl seilen ka ni" tiin a lo sawi tawh a ni. Hillsong Kohhrana lawi niin, naupangte a nih lai aṭang rawngbawlna lama inhmang tak a ni.