Barbados-in Rihanna 'National Hero'-ah puang

British lalram mangṭha chiahtu ram Barbados chuan an ram singer lar Robyn Rihanna Fenty chu an ram 'National Hero'-ah an puang.

Thawhlehni khan Barbados hian Queen Elizabeth II chu an ram hotu lu ber a nihna aṭanga paihin khawvela mipui thlan rorelna ram, republic thar ber an ni. Hemi an puanchhuahna inkhawmah hian mi lar tak tak telin chung zingah chuan Prince Charles leh Rihanna-te pawh an tel.

He hunah hian prime minister Mia Mottley chuan pop singer Rihanna chu 'National Hero of Barbados' chawimawina an pek dawn thu a sawi. Kum 33 mi hnenah hian Mottley chuan, "May you continue to shine like a diamond," tiin a sawi a, he a ṭawngkam hi Rihanna hla hit "Diamonds' behchhan a nih avangin miin an ngaihven zui hle.