Femina Miss India 2018 atan Tamil nula - Anukreethy Vas
Tamil Nadu nula kum 19 mi Anukreethy Vas chu fbb Colors Femina Miss 2018 atan thlan a ni a, Haryana sate aiawhtu Meenakshi Chaudhary chu first runner-up niin, Shreya Rao Kamavarapu, Andhra Pradesh chu second runner-up a ni. Anukreethy Vas hi Miss World 2017 Manushi Chhillar chuan crown a khum tir a ni.
Femina Miss India Grand Finale hi Dome, NSCI SVP Stadium, Mumbai-ah neih a ni a, filmmaker Karan Johar leh actor Ayushmann Khurrana te chuan an host a ni. Miss India thlan ṭum 55-naah hian contestant 30 an tel a, Loyola college-a zirlai Anukreethy hian endiktute mit a tlung ta ber a ni.
Judge-te hi an hrawl hle a, Bollywood actor - Malaika Arora, Bobby Deol leh Kunal Kapoor te bakah, cricketer Irfan Pathan leh KL Rahul te an ni nawk. An zingah hian Miss World leh Femina Miss 2017 ni bawk Manushi Chhillar pawh hi a tel a ni. Grand Finale-ah Miss United Continents 2017 Sana Dua leh Miss Intercontinental 2017 Priyanka Kumari te chuan runner-up te crown an khum tir a, Madhuri Dixit, Kareena Kapoor leh Jacqueline Fernandez te pawh an inlan bawk.
Hmabak
fbb Colors Femina Miss 2018 atan thlan Anukreethy Vas hian Miss World 2018-ah India ai a awh dawn a ni. Miss World 2017 atana Manushi Chhillar thlan a nih hnuah India nula ten ngaihven a hlawh thar leh mek a, Miss World thlanna neih leh turah pawh Anukreethy Vas chungah hian beiseina a sang hle a ni.
First runner-up Meenakshi Chaudhary chuan Miss Grand International 2018-ah India ai a awh dawn a, Miss United Continents 2018-ah second runner-up Shreya Rao Kamavarapu a tel bawk ang.
Anukreethy Vas
• Kum 1999 khan Chennai-ah a piang a, an chhungkua hi Hindu sakhaw zuitu an ni.
• A hming tak hi Anukreethy Vas a ni a, 'Anu' tiin an ko thung.
• Modelling lamah a tui hle a, film a chang tawh bawk.
• Loyola College, Chennai-ah B.A (French) a zir mek.
• Super Model nih a tum a, French ṭawnga zir chhan pawh International Model nih a tum vang a ni.
• Miss Tamil Nadu 2018 atan thlan a nih hnuah Femina Miss India-ah hian an state ai a awh zui.
• fbb Colors Femina Miss 2018 atan thlan a ni a, Miss World 2018-ah India ai a awh ang.