fbb Colors Femina Miss India 2018 ; Fashion Icon atana thlan Miss India Mizoram Lily Lalremkimi Darnei

fbb Colors Femina Miss India 2018 intihsiakna neih mekah June 15, Zirtawpni zan khan sub-contest winner puan a ni a, Miss India Mizoram Lily Lalremkimi Darnei chuan Fashion Icon title a la. Lily Darnei hian Miss Iron Maiden title a la tawh bawk a ni.

Sub-title hlanna hi Renais­sance Mumbai Convention Centre Hotel-ah neih a ni a, sub-title 21 sem chuah a ni.

Fashion Icon thlanna hi a hautak hle a, show vawi khat inlan aṭang ngawta thlan a ni hauh lo. Contestant-te hi Miss India camp-a an awm chhunga an kawr hak hrang hrang aṭangin teh an ni a, May 16 - June 14 chhunga show ṭum 11 zet an neih aṭnga thlan chhuah a ni.

Contestant te hian designer ṭha ber berte kut chhuak an inbel a, Fashion Icon sub-title la tur hian an thawkrim hle a ni. Fashion Icon hi sub-title zinga ngaihlut pawl a ni.

Lily Darnei hian Mizo desig­ner hrang hrang - Manuntei Sailo, Hannah Khiangte, Rempuii Hmar, Chris­tine V, Sangboihi leh Vakiria te kutchhuak a inbel a ni. Anni bakah hian Maria Fanai, Zwaan, Karan Malhotra, Mahek Punjabi te kawr a ha bawk.

Kawr hrang hrang an ha satliah mai a nio lo a, ṭum 11 zet endik an ni a, a hautak hle a ni. Fashion Icon nihna hi Miss World 2016 Stephane de Valle chuan a hlan a ni.

Lily Lalremkimi chuan "Fashion Icon ka lak theihna chhan hi ka designer-te vang liau liau a ni a, an chungah ka lawm takzet a ni. Min ṭantu leh ṭawiawmtu ka ngah hle a, an chungah ka lawm hle a ni" a ti.

Miss Iron Maiden chu

Miss Iron Maiden thlanna hi May 19 khan Bennett University-ah neih a ni a, Miss India Contestant zinga fit ber thlanna a ni. Hemi atan hian physical fitness a pawimawh hle a, sport chi hrang hrang tihpui an ni. Hetah hian Lily hi pakhatna a ni a, Iron Maiden nihna hi Rohit Khandewal, Mr. World 2016 chuan a hlan a ni.

Lily Darnei chuan, "Mizo mipuite min thlawp­na avangin ka lawm a, a tawp thlenga min ṭawiawm a, min lo ṭawngṭaipui zel turin ka ngen tak meuh meuh che u" tiin a sawi.

State 30 aiawhte intihsiakna

Femina Miss India thlanna hi June 19, Thawhlehni hian a hmawr bawk a ni dawn a, Mum­bai-a NSCI Dome-ah Grand Finale hi neih a ni ang.

fbb Colors Femina
Miss India 2018 Sub-title Winner
Miss Fashion Icon
- Lily Lalremkimi Darnei (Mizoram)
Miss Vivacious
- Mamita Debbarma (Tripura)
Miss Goodness Ambassador
- Shreya Rao Kamavarapu (Andhra Pradesh)
Miss Glamourous Look
- Gayatri Bhardwaj (Delhi)
Miss Popular
- Gayatri Bhardwaj (Delhi)
Miss Rampwalk
- Meena Ahir (Madhya Pradesh)
Miss Body Beautiful
- Anna Kler (Punjub)
Miss Refreshing Beauty
- Mary Khriem (Meghalaya)
Miss Shining Star
- Prarthana Sarkar (West Bengal)
Miss Photogenic
- Meenakshi Chaudhary (Haryana)
Miss Tech Beauty
- Aashana Gurav (Goa)
Miss Glowing Skin
- Prarthana Sarkar (West Bengal)
Miss Getaway Goddess
- Spandana Palli (Chhattisgarh)
Miss Spectacular Eyes
- Gayatri Bhardwaj (Delhi)
Miss Lifestyle
- Mehak Punjabi (Maharashtra)
Miss Active
- Himanshi (Uttar Pradesh)
Miss Beautiful Smile
- Anukreethy Vas (Tamil Nadu)
Miss Iron Maiden
- Lily Lalremkimi Darnei (Mizoram)
Miss Congeniality
- Osin Mosu (Arunachal Pradesh)

fbb Colors Femina Miss India 2018 sub-contest ceremony-ah hian Miss World 2017 Manushi Chhillar leh Miss World Chairperson Julia Morley te hnenah special award hlan a ni a, Miss World 2016 Stephanie Del Valle pawh a inlan bawk a ni.