Amazon India in kum nga tling

Moneyconnexion.com in nikum lama India rama Online Shopping site tlawh hlawh bera a puan Amazon India chuan nimin khan kum nga a tling.

Amazon India hi nimin khan India rama an site an tlangzarh aṭanga kum nga na chiah a ni a, online shopping ti ṭhin chuan kan hre ṭheuh anga, Amazon-ah hian bungrua an nei chikim em em a, thil te ber aṭanga a lian ber thlengin an nei kim hle.

Moneyconnexion mai bakah Cashback offers pawhin Top 25 Online Shopping Sites in India 2018 a thlanah pakhatna a ni bawk a, Bloggersideas ranking-ah erawh Flipkart tluk lo in pahnihna a ni thung.

Moneyconnexion hian nikum June thla khan India ramah hian internet hmang mi maktaduai 500 vel an awm tawh niin an tarlang a, internet hmang hi an pung zel a, online shopping pawh hi kan uar telh telh dawn niin a lang.

Amazon hi kum 1994, July 5 khan Jeff Bezos chuan bul a ṭan a, a tir chuan Cadabra.Inc tih a ni ṭhin a, 1995 khan Amazon tiin a hming a thlak a ni. Headquarters hi Seattle, Washington, US-ah an nei a, ram hrang hrangah website hrang hrang an nei tawh bawk.

Amazon hnuaiah hian nikum chhung khan hnathawktu khawvel pumah mi 566,000 an awm nia tarlan a ni a, a neitupa Jeff Bezos pawh hi Time.com chuan khawvela mi hausa ber a nih thu a lo tarlang a ni.

Amazon hi lian viau tawh mah se tunah hian total sales-ah Alibaba group an la tluk lo thung.

Nimin lama Amazon.in tlawhtu te chuan an hmu ṭheuh ang a, Bezos hian India rama an webiste-ah hian India rama shopping site tlawh hlawh ber kum hnih lai an ni thei chu lawmawm a tih thu a ziak a, digital payment hmanga Amazon.in-a nimina thil cheng 1000 man chin chunglam chah te tan cheng 250 Amazon Pay Balance Cashback an pe bawk a ni.