Facebook company hming thar META

Facebook chuan an company hming Meta tiin an thlak.

Facebook hian an company hming hi Meta tiin thlak mah se an appliaction leh an platform ho hming- Facebook, Instagram leh WhatsApp tih an la hmang zui dawn tho a, heng platform hrang hrangte hi Facebook hnuaia awm tawh loin Meta hnuaiah an awm tawh dawn tihna a ni.

An company neitu Mark Zukerberg chuan Facebook hming thar puanzarna hi 'metaverse'- online khawvel, miin game, hna leh inbiakna virtual hmanga an kalpui theihna tur, din an tumna kawng khat a nih thu a sawi.

An brand hming 'Facebook' chuan an thiltih zawng zawng ai a awh zo dawn lo tih sawiin company hming an thlak a ngaih phah ta tih a sawi a ni.

"Hun lo kal zel turah chuan metaverse company tia min hriat ka beisei a" tia sawiin,"Tunah chuan kan sumdawnna chu ṭhuang hnihin kan thlir a, pakhat zawk chu kan application chhungkua atan a ni a, a dang leh chu hun lo la awm tura kan platform tur atan a ni.

"Chumi peng pakhat atan chuan, kan hnathawh lam hawi leh kan la din tur lam hawi tilang tura kan beisei company brand thar kan hman a ngai ta," a ti.

Facebook hian an Menlo Park, California-a an headquarter-ah pawh an company logo thar chu Ningani khan an tar tawh a, thumbs-up "Like" logo hmang tawh loin 'infinity' chhinchhiahna a pawla inziak chu an hmang tawh zawk a ni.

'Meta' tih thumal hi Greek ṭawng aṭanga lak niin a awmzia chu 'piahlam (beyond)' tihna a ni.