Synod Choir Music video thar 'Kan zin kawngah'

Mizoram Synod Choir music video thar, 'Kan zin kawngah' tih chu nizan khan Choir Cabin, Synod Conference Centre-ah Pathian hnenah hlanin tihchhuah a ni.

Mizoram Synod Choir music video thar 'Kan zin kawngah' tih hi T. Laldintluanga phuah a ni a, T. Laldintluanga hi tunlaia fakna hla phuahtu kan neih langsar zinga mi niin, a hla tam tak chuan sak a hlawhin, hriat pawh an hlawh hlawm hle. Tunah hian Synod Choir-a an conductor ni lai mek a ni nghe nghe.

Audio hi Kings & Prophets-a record a ni a, music hi Ralte Mesa leh Maenga te kut chhuak a ni thung. A video hi Asanga Dosel Photography kut chhuak a ni. Hla thar hi Hruaina Eng channel-ah tichhuak nghalin Central KṬP YouTube channel-ah dah nghal a ni.

Hri lêng kara inkhuahkhirhna avangin Synod Choir hian hla pawh an zir hlei thei lo fo a, heti chung hian tuna an music video hi kum 2020-2022 term-te'n official-a music video an siam pathumna a ni. Hei bakah hian Kristian Chhungkaw Tehna Golden Jubilee lawmna pualin music video pahnih an siam bawk.

Synod Choir hian Music video album siam tumin hma an la mek a, electronic media hmangte'n hla an zir fo. Tunah hian Bangalore lama programme nei turin an inbuatsaih mek bawk a ni.