'Khawngaih chhandamna' hla nen Thawhlehnaniropuia

Idol star Thawhlehnaniropuia (Puipuia) chu hun eng emaw chen a reh hnuah hla thar nen a inlar leh dawn ta. 'Khawngaih chhandamna' tih hla chu vawiin hian a tichhuak dawn a, YouTube leh Zonet local channel lamah te en tur a awm thuai dawn.

Puipuia hian nikum kum tir lama muisc video a tih chhuah bak kha a la tichhuak leh lo a, kum khat dawn a vei ta. Mahse Zohmun tlangval hian reh hlen a tum lo a, hla thar nen a lo kir leh ta a ni. Tun hi Idol a tel hnua music video paruk a tihchhuahna tur a ni bawk.

'Khawngaih chhandamna' tih hla phuahtu hi Parpuii Chawngthu niin, a ni hian Pathian hla ṭhahnemtak a phuah tawh. Puipuia pawh hian a hla a lo sak sak nual tawh a, tuna mi hi a pali-na a ni. Tun ṭuma a music video hi Tea chhakchhuak siam sak a ni a, recording hi A16 kutchhuak a ni thung.

Thawhlehnaniropuia chuan, "Music video siam tur hian keima theihna mai chuan engmah ka puitlin thei lo tih ka hria a, hriselna min petu Pathian chungah lawmthu ka sawi a ni. Ka nu leh pa bakah, ka unauten min ṭawiawm ṭha em em a, sum leh paia min puitute chunga thinlung takin lawmthu ka sawi a ni," a ti. Video siam saktu leh phal taka hla sak tirtu chungah a lawmthu a sawi bawk.

Thawhlehnaniropuia hian Govt. Repulic High School-ah pawl 12 a zir mek a, duh angin music lamah a inhmang tam thei rih dawn lo. 'Khawngaih chhandamna' tih hi kumina a music video awm chun a ni hial mai thei bawk.