Alec Baldwin silai hmeh puahah hmeichhe pakhat a thi

American lemchan thiam Alec Baldwin chuan New Mexico-a lem an chan laiin 'prop gun' a hmet puak a, hmeichhe pakhatin nunna a chan bakah midang pakhat a hliam bawk.

US police-te chuan niminah khan hemi chungchang hi sawiin, 19th Century western film 'Rust' an chan laiin Baldwin hian lemchanna atana hman tur silai hi a hmet puak a, nu pakhat Halyna Hutchins chu kap fuhin helicopter hmangin damdawi-in panpui mah se a hliam tuar loin a thi ta a ni. Halyna Hutchins bakah hian director Joel Souza pawh a hliam a, damdawi-inah enkawl zui a ni nghal tih an sawi.

Hutchins hi kum 42 mi niin 'Rust'-ah hian director of photography a ni a, police-te chuan thil thlen dan hi an chhui zui nghal a ni.

Kum 48 mi Joel Souza chu ambulance hmangin damdawi-in lam panpui vat a ni a, a hliam tawrh dan chugchang erawh chiah takin an la sawi lo thung.

AFP news agency chuan Baldwin pawh hi detective-te bulah a inlan tawh a, nimin thleng kha chuan thubuai thehluh a la ni lo bawk.

Alec Baldwin hi an film chan mekah hian co-producer a ni nghal bawk a, Harland Rust lemah a chang bawk a ni.