MYC Perhkhuang Grand Finale zaninah

Mizoram Youth Commission (MYC)-in zai intihsiakna a buatsaih MYC Perhkhuang Grand Finale chu zanin dar 8-ah Dawrpui Multipurpose Hall-ah neih a ni dawn.

Angelina Paul leh Mark V Vanlalrema-te compères an ni dawn a, Dr Vanlalṭanpuia, MYC Chairman chu inlawmna thuchah sawi tur niin Top 10 contestant-te hnen aṭangin zai ngaihnawm tak ngaihthlak tur a awm dawn a ni.

HS Lalruatliana (Boom-a), Project Director, North East Wave, Abu Metha, Advisor to CM, Govt. of Nagaland, Dr Munish Singh, Regional Director, Indian Council for Cultural Relations (ICCR) leh Lalchhandamna Ralte, Minister of State, LESDE-te chuan thu an sawi dawn bawk.

Sound from the Hills leh Sucheta Bhattacharjee, Centre of Creative Excellence, Mumbai-te chu an inlan bawk ang.

Top 10 aṭangin a tiṭha zual mi panga an thlang chhuak leh dawn a, chung mite chu zaninah hian an perform leh vek dawn.

MYC chuan heng zaithiam mi panga thlanchhuahte hi contract mumal tak a ziahpui dawn bakah ram chhung leh pawna an platform tur thlengin a ngaihtuahsak dawn bawk. Thla hmasa khan North East Wave leh MYC hian MoU an ziak tawh a, tin, zanina mi panga an thlan chhuah turte hi Rs nuai khat hu ṭheuhin bul an ṭanpui dawn a ni.

MYC Perhkhuang Grand Finale hi LPS 10 leh Zonet Zawlbuk bakah YouTube lamah live-in an pe chhuak dawn a ni.