Mizo history behchhana film siam 'Laltheri' tlangzarh a ni dawn ta

Sailo lal, Lalsavunga fanu Lalchawngpuii chanchin beh­chhana siam 'Laltheri' film chu vawiin chawhma dar 11:00 hian Aizawl Press Club-ah tlangzarh a ni dawn a, chhuah nghal a ni ang.

He film-ah hian Lalchawng­puii (Laltheri tia an koh bawk) chanchin ngaihnawm tak tarlan a ni a, a nulat vanglai chanchin te, hnamchawm tlangval Chalthanga nena an inngaihzawn dan te tarlan a ni. Laltheri-i'n hnamchawm tlang­val Chalthanga a hmangaih avanga neih ngei a tum dan te leh, Chalthanga thah sak a nih leh tak si avanga a tawrhna te tihlan a ni bawk.

Laltheri film-ah hian kan pi leh pute hunlaia pasalṭha te inpekna leh huaisenna te pawh tarlan a ni. Khawtlang tana an rinawmnna leh hlutna te tarlan a nih rualin, mi verther te avanga harsatna thleng ṭhin pawh he film-ah hian tihlan a ni.

Heng bakah hian tunlai ṭhangthar tam takin a awm zia an hriat tawh loh, lal sutpui vawn hi engnge ni tih te chu he film-ah hian hmuh theihin a awm dawn bawk.

Technical
Mizo film industry-a sulhnu eng emaw zat lo hnutchhiah tawh C.Hmingthangvunga chuan he film hi a direct a, photography leh editing hi H.Lalchhuanawma (Anna) chuan a khawih thung. Mizo film star lar hmasa Louis Hauhnar chu co-producer niin, original soundtrack hi C.Bawiha siam a ni.

'Laltheri' film hi kum khat dawn a siam nan hun hman a ni a, nikum September thla aṭang khan shooting neih ṭan a ni. A changtute pawh hi uluk taka thlan niin, MFDS artistes skill training zo leh National School of Drama chhuakte an ni nawk. He film-ah hian mi 100 vel zet an inlan a ni.

An thuam inbel pawh hi uluk taka thlan niin, hmanrua pawh Mizo history tarlang thei tur dap khawm a ni. Action film a nih ang ngeiin chempui, pasaltha chem, mi lulak chem, fei leh phawte pawh hmuh tur a awm nawk dawn a ni. Shooting hi Falkawn-a Zokhuaah neih a ni a, a hmun leh hma pawh chei danglam nual a ni.

Laltheri film hi zanin hian D.M Theatre, Folkland-ah chhuah a ni dawn a, online-a en duh tan man chawiin www.tuifar.com ah en theih a ni bawk ang.

Veng hrang hrangah chhuah theih tura ruahman niin, pawl leh mimal sumtuak nana hmang duh tan heng number - 9862362668/9402312446-ah te hian booking tih theih a ni.