Box Office ; Avengers: Infinity War khum thei la awm lo
Kumina film chhuak tawh zinga thawm nei lian ber Avengers: Infinity War chu US Box Office-ah a che ṭha zui zel a, khum thei an la awm lo.
He science fiction film hian a zawnin kar thum chung chu sum lalut hnem ber dinhmun a luah tawh a, khawvel huapa sum hailut tam zual panga zingah inhlangkai bawk.
American film Film producer lar Anthony Russo leh Joe Russo te kut chhuak film hi khawvel hmun hrang hrangah chhuah chhoh mek a ni a, China-ah pawh tichhuah a ni tawh. Infinity War hian US-ah bik kar liamta chhung khan $mtd 61.8 zet a lalut leh a, Box Office aṭanga a sum lakluh tawh zat chu $mtd 547.8 zet a tling tawh.
China aṭang ringawt pawhin $mtd 200 vel zet a lalut tawh a, kar liamta chhung khan khawvel hmun hrang hrang aṭangin $mtd 349 zet a lalut leh a ni. A sum thawhchhuah tawh zawng zawng hi $tld 1.6 chuang zet a tling tawh a, film chhuak tawh zinga sum lakluh tam lamah panga-na a ni.
Record chu
Sum lakluh tam lamah hian hollywood star rual inlanna Infinity War hian Furious 7, Frozen, Black Panther, Star Wars: The Last Jedi leh Harry Potter and the Deathly Hallows - Part 2 te a khum der tawh. Hei mai hi a la ni lo a, Jurassic World khumin pali-na dinhmun luah thei turin a dinhmun a ṭha hle. Hetih rual hian Force Awakens ($tld 2), Titanic ($2.1) leh khawvela sum lalut hnem ber Avatar ($tld 2.7) te chu a la hlat viau thung.
Infinity hi Brazil-ah chuan sum lalut hnem ber a ni mek a, Central America, Bolivia, Venezuela, Philippines, Indonesia, Malaysia, Singapore, Vietnam leh India-ah te pawh tuma tluk rual lohin a kal fawr mek.
China-ah pawh a che chhe lo a, Zirtawpni khan chhuah ṭan niin, he mi ni vek hian $mtd 71 zet a lalut nghal. China-ah hian pekchhuah ṭan ni-a sum lakluh tam lamah Monster Hunt 2 ($mtd 86) chiah tluk loh a nei. Hetih lai hian superhero movie bikah chuan sum lalaut hnem ber a ni thung.
Box Office
North American Box Office-a roreltu chu Infinity War a ni a, Life of the Party chu sum lalut tam pahnihna a ni. April 30-a tlangzarh Comedy film hian $mtd 18 zet a lalut a, Breaking In ($mtd 16) chuan a dawt. Comedy film dang Overboard chu sum lalaut tam zual zingah a tel bawk a, palina a hauh phak.
Hetih lai hian No. 1 pawh lo hauh ve zawk tawh A Quiet Place chu top 5-ah alang pha ṭawk a, Dwayne 'The Rock' Johnson channa Rampage leh Black Panther te chu top 10-ah an lang bawk.