Hontrade International Ṭhazual Lengzem Chart-ah Mipa langsar F. Zomuanpuia a sang ber

Hun eng emaw chen chu Hontrade International Ṭhazual Lengzem chart-ah hmeichhia an langsar zawk a, tun ṭumah erawh mipa lamin ro an rel ve thung. F. Zomuanpuia chuan 'Lo let leh la' tih hla hmangin dinhmun sang ber a luah a, H. Lalvulmawia a langsar viau bawk.

F. Zomuanpuia hi chart hmasa lamah khan top 5-ah a lang phak lo a, tun ṭumah erawh dinhmun sang ber a luah. A hla 'Lo let leh la' tih chu tun lai lengzem hla thlan hlawh ber a ni mek a, chart hmasa lama pakhatna H. Lalvulmawia chu a rawn kum a ni.

Tun ṭumah hian H. Lalvul­mawia hian 'Kan intiam tawh ang' tih hla hmangin pahnihna ahauh leh tho a, top 5-a lang phak hla pahnih nei thei mi tlem te zingah a tel. 'Kan intiam tawh ang' tih hla hi Dina Jathang phuah niin, tun lai lengzem hla lar ber pawl a ni mek.

He hla phuahtu Dina Jathang hian chart-a lang phak hla eng emaw zat a nei a, chart-a din­hmun sang ber lo luah tawh Jen­ny Jathang sak 'I hlui thei mawlh lo' tih pawh a tel a ni.

Pathumna hauhtu chu tun hnaia intuai thar leh mek Tommy L Pachuau a ni. Tommy hi tun hnaiah chart-ah a lang zing viau a, a hla 'Ngaihlai i bang lo'ng' chu ngaihthlak hlawh ber pawl a ni. Top 5-ah hian hmeichhia pakhat chauh a lang a, chu chu Lalramdini Fanai a ni. 'Mengmawi' tih hla thiam tak maia satu Lalramdini Fanai hi No. 1 pawh lo hauh tawh a nih avangin top 5-a a la lang cheu hi thil mak a ni lo.

Dj Lalvenhimi hla thar nen a lo kir thu kan sawi a, ṭum dang ang bawkin chart-ah a lang leh nghal chat. Tun lai lengzem singer zinga boruak nei lian ber pawl DJ-i hian 'A pawi emai' tih hla hmangin parukna a hauh a ni. He hla hi tun hnai khan local channel lamah pek chhuah a ni a, YouTube lamah pawh en theihin a awm bawk.

Mizo Idol aṭanga hriat hlawh Mathlenga chu top 10-ah a lang leh a, Richard Chawngthu leh Malsawmtluanga te a sang zual zingah an invawrh kai. 'Bingtaii' tih hla hmangin Isaac Chhangte chuan hnu a khar thung.