PUC-in Mizo naupang hla Nursery Rhyme tlangzarh

Pachhunga University Col­lege chuan, Mizo naupang hla (Nur­sery Rhyme) chu 'Animation video' a siamin, mipui en theih turin an college YouTube channel 'Pachhunga University Col­lege Official Chan­nel'-ah an phochhuak ta.

He animation video 'PUC Pawnto' tih hi Mizo Deparment-a Mizo Cultural Studies and Performing Arts bultuma buatsaih a ni. A video siamtu hi Asanga Dosel niin, College principal Dr.Tawnenga chu producer a ni thung.

Hla an phochhuah hmasak ber hi Mizo children literature-a sulsutu Nuchhungi Renthlei (Padma Shri) hla phuah 'Zing eng mawi' tih a ni a, H.Vanlalhlimpuii (Hlimhlim-i) chuan a sa a ni.

Mizo Department hian animation video siam project hi kumin kum bul aṭang khan an ṭan a, tunah hian Nu­chhungi hla panga lai video-a siam hna an thawk mek. Chung zingah chuan 'Ui note hla' pawh telin, YouTube lamah pho­chhuah leh thuai theih an inbeisei a ni.

College Principal, Dr. Tawnenga chuan, "Mizo naupang te hi hnamdang nursery rhyme ringawta chawm seilen an ni tur hi ṭha kan ti lo a, Mizo hian kan pi leh pute aṭangin nauawih hla leh naupang hla ṭha tak tak kan nei a ni. Hengte hi tunlai thiamna leh theihna hmanga kaihthawh leh kan duh a, keimahni ṭawng ngei, keimahni hla ngei hmangin kan naupang lo ṭhanglian turte hi chawm leh kan duh a ni" a ti.

Animation video-te hi YouTube lamah upload zel a ni dawn a, a duh apiang tan en theih tura chhawpchhuah tum a ni.