Mizoram University festival ṭan a ni ta ; Vawiinah Rock Fest leh Virthli Talk

Mizoram University festival 'Virthli' chu nimin khan ṭan a ni ta a, festival hawnna hi MZU administrative building kawtah hman a ni. Registrar C.Zothankhuma chuan Virthli hi a hawng a, festival puala siam t-shirt leh bulletin a tlangzarh nghal bawk.

Virthli-a inelna hmasa ber atan hian marathon race neih a ni a, zirlai 70 chuang an tlan. Tun ṭum festivala ngaihven hlawh ber pawl Futsal chu khelh ṭan niin, team 65 lai an tel. Nimin khan pool A leh B-te'n first round an khel zo a, vawiinah pool C leh D te'n an khelh chhunzawm ve leh ang.

Ni khatna chu
A ni khatnaah hian debate pawh ṭan nghal a ni a, MZU hnuaia college hrang hrang leh MZU-a Department hrang hrang te chu topic thlan bik hmangin an intihsiak. Topic atan hian 'In context of Global warming, India's attempt to conserve water is effective' tih leh 'Political party-te hi ram hmasawnna daltu an ni' tih hmangin debate hi neih niin, vawiinah result puan a ni ang.

Vawiinah 'Virthli Quiz' preliminary round neih a ni dawn a, team 53 an inlan ang. An zing aṭang hian team 12-in final round an lut dawn a ni. Kumin aṭanga telh thar Book Fest leh Cultural Mela pawh Auditorium-ah neih niin, Publishing House lian tham inphochhuahna hi zirlaite'n an hlut hle.

Virthli Talk
Festival-a ngaihven hlawh ber pakhat chu 'Virthli Talk' awm tur hi a ni. Talk hi vawiin hian neih a ni dawn a, ṭhalaite ngaihsan - Lalnghinglova Hmar, Vanneihtluanga, K. Sapdanga, Ramhmangaiha leh PL Liandinga te'n thu an sawi dawn. Heng mite hi zirlaite chuan inkawmhona hun an hmanpui ang.

Vawiin vek hian Rock Fest ṭan a ni dawn a, Writing Competition bakah E-Gaming ṭan tura ruahman a ni bawk.