MYC-in Youth Summit & Road Show 2018 buatsaih dawn

Mizoram Youth Com­mission (MYC) chuan April 24 aṭang hian Youth Summit & Road Show 2018 a buatsaih dawn a, Aizawl leh District dang­ahte kalpui a ni ang.

MYC chuan Mizo ṭha­­laite hmasawnna tur leh nakin hun atana chhawr tlak leh hna ṭha tak an thawh theihna tur beiseiin summit hi a buatsaih dawn a ni. Aizawl bikah hian April 24 - 25 chhung khian Assembly House Annex building, Treasury Square-ah buatsaih a ni dawn a, hemi hnu hian dis­trict khawpui hrang hrangah neih chhunzawm a ni ang.

Stall 50 chuang 
Youth Summit-ah hian stall 50 chuang a awm dawn a, zirna leh ei­zawnna kawng hrang hranga mi thiam bik rawn tur an awm ang.

Lemziak leh thlalak lam te, rimawi, pangpar khawi, designing leh puanṭhui lamahte pawh rawn tur an awm dawn.

Hei bakah hian kut themthiamna lam, spa leh hmai chei, sam siam leh lemchan lama experience lo nei tawh mi eng emaw zat an tel dawn a, a thlawn veka biak rawn theih an ni dawn. Zirlaite tan phei chuan he hun hi hmaih phal chi a ni lo a, ramchhung leh pawn thleng pawha zirna-in ṭha tak takte dawr theihna hun ṭha a inhawng dawn a ni.

Youth Summit chhung hian All India Service leh Central Service exam tumte tan coaching class kal theih dan tur remchang a awm dawn. Hotel management leh cabin crew thlenga luh theih dan tur inhrilhhriatna hun hman a ni dawn bawk.

Art exhibition a awm dawn bawk a, thlalak leh lemziak (painting) ṭha­hnem tak pho chhuah a nih dawn bakah, helama mi thiam bikte’n a thlawna zirtirna hun an hmang ang. Ṭhalai hna zawng mekte tan sorkar deparment thlan bikte’n online leh offline registration tih theihna an hawng dawn a, LESDE hnuaia employment registration ti duh tan pawh kawng hawnin a awm dawn bawk.