MDM Ṭhazual Fakna ; Nunui khum thei an awm lo

Lalhmangaihzuali (Nunui) chuan Ṭhazual Fakna chart-ah pakhatna a hauh leh a, a zawnin dinhmun sang ber a luah.

Nunui hian 'Min kian san suh' tih hla hmangin chart hmasa lamah khan a vawi khat nan No. 1 a lo hauh tawh a, tun ṭumah pawh khum thei an awm lo. Nunui hian Pathian hla mawi leh danglam tak hmangin mipui min awi a, chart-ah pawh thlan hlawh ber a ni mek. A hla hi sakpui nuam leh music video pawh dangdai tak a ni. 'Min kian san suh' tih hi Amtea lehlin a ni a, hla thothang ṭha tak a ni. A hla hi a tunlai a, hei vang hian thlan pawh a hlawh ta tih theih awm e.

Chart-a pahnihna chu 'Krawsah chuan famkim I ni ' tih thiam taka satu Aizawl Venglai KTP, Mika Group te an ni. Anni hi chart-ah an lang zawn rei tawh hle a, a chung bera awm turin rahbi khat bak an mamawh tawh lo. Hetih lai hian Various Artist an hnungtawlh a, pahnihna aṭangin pathumnaah an tla thla. MDM Various Artist sak 'I chakna ringin' tih hla pawh hian thlan a hlawh hle a, Mizo mipa zaithian C.Sanga hriatrengna hla hian chart-ah hmun pawimawh a chang.

Pali-na chu Zorinsanga Sailo a ni. Zorina hla 'Min hual reng ṭhin' tih hi tunlai Gospel hla lar ber pawl a ni a, thlan a hlawh zui zel a nih pawhin a mak lo ang. Social media lamah pawh a lar hle a, a bikin ṭhalai lamah a tlana hle a ni. Idol aṭanga mipui hmelhriat Bka pawh 'Vanram' tih hla hmangin top 5-ah a lang leh bawk.

Top 10-ah hian chart hmasa lama lang lo Seraphic Choir te an lang thar a, 'Ka tlang thianghlimah' tih hla hmangin Daisy Lalbiaknungi a inlar thar bawk.