DGR-in Mizoram-a ESM Security Agency a pawm hmasak ber 6837/H.Lalnunsangi Security Agency

Mizo zinga Military Intelligence Officer hmasa ber leh awm chhun, Major H Lalnunsangi chu Directorate General Resettlement-in Mizoramah ESM Security Agency din turin a pawm a, a security agency hming chu '6837/H.Lalnunsangi Security Agency' tih a ni.

Security Agency hming hi an duh an thlang thei lo tih Major H Lalnunsangi (Maj. Mami) chuan Vanglaini hrilhin Sorkar laipui hnuaia awm Directorate General Resettlement, Department of Ex-Servicemen Welfare (Ministry of Defence) chuan hming hi a pek a ni a, he agency a thawk tur hi tunah hian mi pakua lakfel an ni der tawh.

'6837/H.Lalnunsangi Security Agency' hi Ex-Servicemen te tan chauh a ni a, Maj Mami chuan Zoram mipuite tana malsawmna a nih ve theihna kawng nia a hriat thu a sawi.

He security agency hi Ex-Servicemen, mahni khaw lama awm tawhte'n an puanthuah tel loa hna dang, an chhungte an chawm zui theihna tur a ni tih leh a tum ber pakhat pawh a nih thu Maj Mami chuan a sawi a, Central Public Sector Enterprise (CPSE)-te hnenah chauh he agency hian venhimna an pe theih dawn thung a ni.

'6837/H.Lalnunsangi Security Agency' hian Ningani aṭang khan Mualkhang-a LPG Bottling Plant-ah venhim hna an ṭan tawh a ni. Mualkhanga thawk tur an nih avang hian an lak hmasak mi pakuate pawh hi Kolasib district-a mi deuh vek an ni a, Sairang mi pakhat lak ni bawkin puanthuah tel ngai loa hna an thawh chu he scheme-in a tum ber a nih avangin district danga mi chu lak an ni lo tih Maj Mami chuan a sawi.

CPSE hnuaia office dangah pawh he agency hi an la inzar pharh zel dawn a, kum hnih thum hnuah chuan mi 100 chuang a chhawr theih a beisei thu Maj. Mami chuan a sawi bawk.

'6837/H.Lalnunsangi Security Agency' hi Mizorama DGR hnuaia Ex-Servicemen Reset-tlement Job Opportunity awmchhun leh hmasa ber a ni.