Miss Mizoram 2018 atan North Khawbung nula T. Ramthanmawii (Thanthani)
Miss Mizoram 2018 chu Nilaini zan khan R. Dengṭhuama Hall-ah Grand Finale neih a ni a, North Khawbung, Champhai District nula C. Ramthanmawii (Thanthani) chu Miss Mizoram 2018 atan thlan a ni.
Government Aizawl College zirlai, Republic Venga khawsa mek Thanthani hi Miss Mizoram 2017 Rody H. Vanlalhriatpuii chuan Crown a khum tir.
1st Runner Up chu ITI Veng nula C. Lallawmzuali a ni a, 2nd Runner Up chu CT Malsawmsangi, Bualpui Ng a ni.
Zonet leh Mizoram Journalist Association (MJA) ṭangkawpten an buatsaih Miss Mizoram thlanna hmawr bawk zan, Grand Finale hi Rini Hlondo chuan zei takin a kaihruai.
Amtea chuan fuh fahranin bul a rawn ṭan a, show boruak a nung chho nghal. Contestant 12 ten intihsiak an hmachhawn zui a, an zing aṭang hian a tiṭha zual pariat thlan chhuah an ni.
Top 8-te hian intihsiak an hmachhawn zui leh a, a kar lakah hian zaithiam zai ngaihthlak tur a awm. Zaithiamte hi an zai satliah lo a, an perform a hmuhnawmin mit leh beng a tlai hle.
Top 8 aṭang hian top 5 thlan chhuah leh an ni a, Miss ni thei tur thlitfim zel an ni. Top 5-ah hian T. Ramthanmawii, C.Lallawmzuali, Lily Lalremkimi Darnei, CT Malsawmsangi leh Josephine Lalnunfeli te an inhlangkai.
Anni hian zawhna zawttu tur judge an pawt a, boruak a ṭang hle. Contest te hi an ṭhat tlan avangin top 5 chinte phei chuan zawhna pawh hi an chhang ṭha hlawm khawp mai.
Thanthani-i chuan judge zinga mi Charlie Mathlena zawhna chu ṭha takin a chhang a, Miss Mizoram a nih phahna chhan ti pawhin a sawi theih awm e.
Mizorama show awm tawha ropui ber tih ngam khawpin sound, light leh a stage settings a fuh a; a hmunah mipui an khat tlat a. TV lama lo thlirtute leh a hmuna awmte mit leh beng a tlai hle.
Miss Mizoram 2018 chuan, "Min ṭantute zawng zawng chungah lawmthu ka sawi a, ka phu loh malsawmna a ni. Kan khua North Khawbung bakah Champhai district mipui, kan college GAC, kan veng Republic Veng mipui bakah Mizoram leh ram pawna min duhsaktute chungah ka lawm takzet a ni," tiin Vanglaini a hrilh.
Sub-title Winner
Best Gown - T. Ramthanmawii (Designer Sangbawihi)
Beauty with a Purpose - T. Ramthanmawii
Miss Talented - C. Lallawmzuali
Miss Perfect 10 - C. Lallawmzuali
Best Ramp Walk - KC Lalhmunsiami
Miss Multi-media - Lily Lalremkimi Darnei
Miss Personality - Josephine Lalnunfeli
Miss Congeniality - Emalie B.Lalchhanchhuahi
Miss Active - Lalnunnemi
Miss Photogenic - Laldintluangi
Lawmman
Miss Mizoram 2018 hian lawmman pawisa fai Rs. 1,10,000 leh Vespa Scooter a dawng. Hei bakah hian sponsor tute aṭangin Vivo Phone a dawng bawk a, Miss atan thlan a nih avang hian Dubai a la zin thei dawn cheu bawk. 1st Runner Up C. Lallawmzuali hnenah Rs. 50,000 leh Vivo phone hlan a ni a, 2nd Runner Up CT Malsawmtluangi chu Rs. 30,000 leh Vivo phone hlan a ni bawk. Sub-title latuten Rs.15,000 ṭheuh an dawng a, a tel zawng zawngten Rs. 10,000 an dawng ṭheuh bawk.
Judge panga-te kutah
January aṭangin Miss Mizoram thlanna an ṭan tawh a, kawng hrang hrangin an inel a, Grand Finale-ah judge pangain Question & Answer Round-ah an endik. Fashion pioneer Lucy Sailo, Miss East India 1st runner up lo ni tawh Zikpuii Sailo, Heritage Mizoram neitu Charlie Mathlena, fashion designer leh entreprenuer Abigail Pachuau leh Vanglaini joint editor Tetea Hmar-te'n an endik a; contestant lamin zawhna zawttu tur judge-te hi an pawt a ni.
Thanthani chhanna...
Miss Mizoram 2018 crown khumtu Thanthani hian judge zinga mi Charlie Mathlena zawhna, "Kum khat chauh dam tur ni tawh ta la, Mizoram tan thil pathum eng nge i tih ang, a chhan i sawi tel theih bawk chuan?" tia a zawh chu hetiang hian a chhang :
• "Pakhatnaah chuan - Ka ram leh hnamte tan hian theihtawp chhuahin BWAP (Beauty with a Purpose) a in hmuh ang
ṭheuh khan bawlhhlawh, thing leh mau, rannungte leh tui thianghlim kan neih loh vanga nakina harsatna kan tawh mai tur hi a sutkian theih nan ka damchhung kum khat chu hlu takin ka hmang ang." Thanthani hian project an neihah pawh lui tui humhalh a pawimawhzia zirtirtirna a siam.
• "A pahnihnaah chuan - Kan ramin Pathian hi hei aia nasa zawka a hriat theih nan Pathian thu mitinte nunah ka theih ang tawk tawkin hriattir deuh deuh ka tum ang."
• "A pathumnaah chuan - Tunlaia kan hriat ang ṭheuhin ruihhlo ngaia thi tam tak kan Mizo ṭhalai duhawm tak takte kan hre
ṭheuh ang a, hei hi kei chuan pawi ka ti em em a, hemi a lo bo theihna tur hian theihtawp chhuahin kum khat chhung hun hi nasa takin ka hmang dawn a ni."
A chhan ṭhat em avang hian mipui lam thawm a ring hle a, amah pawh a inringtawk tih a chiang hle.
Zaithiam inlante : Miss Mizoram Grand Finale zan hian tun lai zaithiam lar - Amtea, DJ-i, Zorinzuali Khiangte, Feli Thangluah, Rachael Lalnunkimi leh Hlimhlimi te an inlan.
