Vogue India magazine cover girl Kim Kardashian

Fashion magazine lar Vogue India chuan March thla cover girl-ah Kim Kardashian an hmang a, sawiselna a tam hle. Social media lamah pawh an khel nasa hle a, India khua leh tui pawh ni lo Vogue India cover girl-a hman hi an helh hlawm hle a ni.

Vogue India cover hi tun hnai khan tihchhuah a ni a, a lar nghal hat. March issue hian sawi a hlawh chho viau dawn niin a lang a, social media lama titi luahtu ber pakhat a ni mek. American television star Kardashian-i'n India fashion magazine kawm a mawi hi miin an hrethiam thei lo a, 'Bollywood actress chhe lo leh lar tak tak an awm ve tho' tih chu an ṭanna a ni. Hei bakah hian 'Keeping Up with the Kardashians' star thuam inbel chu a Indian lo an ti a, thla laksaktu te, makeup artist leh hair stylist-te pawh Indian an nih loh avangin an sawisel nasa viau bawk.

Vogue hi a lar leh a darh zau avangin cover girl-te pawh mi lar ber ber leh thil tithei tak tak te an ni nawk. Vogue India bikah hi chuan Bollywood actress-te an lang tam viau a, milarte pawhin Vogue Cover Girl nih hi inchhuan nan tak pawh an hmang fo reng a ni.