George Harrison a rawn lang leh hlawl!

George Harrison tunge a nih kan hria. A album 'All Things Must Pass' chu Billboard 200 chart top 10-ah rawn lang leh hlawlin pasarihna a ni.

Kum 50 hnuah!
Guitar legend, kum 2001-a fam ta The Beatles lead guitarist hian 'All Things Must Pass' hi kum 1970 khan a tlangzarh a, a studio album pathumna niin, he album-ah hian Eric Clapton, Ringo Starr, John Lennon leh an hunlaia musician lar eng emaw zatin an pui.

Ṭhangthar zawkte hriat theih dan tur chuan he album hi 'My Sweet Lord' awmna album kha a ni a, kum 1971-ah khan a zawnin kar sarih chhung ngawt Billboard 200 chart-ah pakhatna a ni.

March 27, 1971-ah khan pakuana ni lehin chumi hnu lamah erawh chuan Top 10-ah a lang leh ta lo.

He album hian kum 50 a tlin lawmna pualin August 6 khan '50th anniversary reissue' an tichhuak a, thar thawh a nih leh takah chuan US mipuite'n an lo la ngaithla kham lo nasa a, Billboard 200 chart-ah pasarihna hial a rawn ni leh ta.

Kar hmasa chhung khan US-ah equivalent album unit 32,000 a hmu chhuak a, heta ṭanga 28,000 lai chu album sales aṭangin a ni.

English rockstar George Harrison hming han sawi rik leh takah chuan rual û zawkte chu an lung a leng thar leh ngeiin a rinawm. Khawvel awm chhunga hla chuai tawh lo tura ngaih 'While My Guitar Gentle Weeps', 'Here Comes the Sun' leh 'Something' te phuahtu hi November 29, 2001 khan kum 58 mi niin a thi a ni.

George Harrison hi Artist 100 chart-ah 10-na a ni a, he chart erawh hi chu an siamna a la rei vak lo bawka, a vawi khat inlanna a ni thung.

Ṭhangthar khawvelah kir ang
Billboard 200 chart-a pakhatna erawh kar hmasa lama pakhatna tho, Billie Eilish niin a album thar ‘Happier Than Ever’chu a zawnin kar hnih chhung pakhatna a nihpui ta.

Kar hmasa chhung khan EAU 85,000 lai a la hmu chhuak niin MRC Data chuan a tarlang a, 36,000 chu album sales aṭangin a ni.

Morgan Wallen 'Dangerous: The Double Album' hnua a zawna kar hnih chhung Billboard 200 chart topper ni leh thei hmasa ber chu Billie Eilish hi a ni a, hla 16 awmna album hi US mipuite chuan an ngaithla nasa viau mai.

Eilish hi Artist 100 chart-ah pawh pakhatna a ni leh a, BTS leh Olivia Rodrigo-te'n an dawt.

Billboard 200 chart-ah hian Olivia Rodrigo 'Sour' chu pahnihna a la ni bawk a, he album hi a hit rei tawh hle. Pathumna chu Nas 'King's Disease II' a ni thung.

The Hot 100 bih leh zuai ila
Billboard Hot 100 chart-ah chuan The Kid LAROI & Justin Bieber 'Stay' chu pakhatna a ni leh a, Olivia Rodrigo 'Good 4 U' bawk pahnihna ni lehin kar hmasa lama pangana Ed Sheeran 'Bad Habits' chu pathumna a ni ve thung.